Ижтимоий тармоқларда Ўзбекистонга келган Толибон вакилларининг масжидлардаги намозхонлар билан учрашуви салбий қабул қилиняпти. Бу ҳақда сиёсатшунос Камолиддин Раббимов Telegram’даги каналида пост ёзди ва вазиятга муносабат билдирди.

Камолиддин Раббимовнинг ёзишича, бугун Толибонда Ўзбекистон тўғрисида ижобий таъсурот шакллантириш муҳим аҳамиятга эга.

«Ижтимоий тармоқларда Ўзбекистонга келган Толибон вакилларининг масжидлардаги намозхонлар билан учрашуви салбий қабул, жиддий танқид қилинаяпти. Толибонни самимийлигига шубҳалар бўлиши табиий. Жумладан, бу ҳаракат сиёсатда ва ҳарбий жараёнда оппонент тарафни агар зарурат бўлса, алдаш мумкин ва керак деб ҳисоблайди.

Лекин бугун Ўзбекистон олдида бошқа вазифа турибди: Толибонни ўзимизнинг давлатимизга нисбатан душман сифатида кўриш ва кўрсатиш эмас, аксинча, мамлакатимиз тўғрисида ижобий таъсурот шакллантириш, кучайтириш керак.

Толибон – мафкуравий ҳаракат. Ўзбекистоннинг мутлақ аксарият аҳолиси, мусулмонлар. Ўзбекистон афғонистонликлар, покистонликлар, эронликлар, турклар ва араблар кўз ўнгида юқори ижобий образга эга бўлиши керак.

Жумладан, толиблар Ўзбекистонни номига эмас, ҳақиқатда мусулмон мамлакати сифатида кўриши, ишониши, ҳурмат қилиши лозим. Бунинг учун, керак бўлса, Ўзбекистон ва унинг аҳолисидаги исломий қадриятлар ҳақида 5-10 та чиройли видеофильмлар олиб, афғонистонликлар учун қулай тилларга таржима қилиб, YouTube’га жойлаб қўйиш керак.

Қўшнилар танланмайди. Уларнинг биз ҳақимиздаги тасаввурлари, уруш ва тинчлик учун, ҳамкорлик ёки совуқ алоқалар учун асос ҳисобланади» – деб ёзган сиёсатшунос.

Аввалроқ Камолиддин Раббимов «Толибон» Афғонистондан Ўзбекистонга снаряд отганларни қўлга олиб, жазолашини билдиргани яхши янгилик эканини айтганди.

«Яқинда толиблар Тошкентга келиб, музокалалар ўтказиб, қайтиши билан Афғонистон томонидан Ўзбекистон ҳудудига бешта снарядсиз ракеталар отилганди. Мен ‘толиблар музокаралардан норози бўлиб кеттимикин», деб хаёл қилган эдим.

Биринчидан, ракеталар толибларни қайтиши биланоқ отилганди. Иккинчидан, ракеталар снарядсиз бўлгани «бу шунчаки сигнал, ичида бомбаси бўлса борми», дегандек мужда берарди...

Лекин толиблар «биз айбдорларни топамиз ва қаттиқ жазолаймиз» дейиши, вазиятни юмшатганди. Бугун эса толиблар «ҳужумларни уюштирган гуруҳ вакилларини» қўлган олганини, жазолашини билдирибди. Бу яхши янгилик.

Бу билан «Толибон» ҳаракати «биз бундай фикрламаймиз, биз бундай қилмаймиз – биз масъулиятли қўшни бўлиш ниятидамиз’, демоқда», – деб ёзганди у.