Ukraina prezidenti Vladimir Zelenskiy Andrey Kostinni bosh prokuror etib tayinlash haqidagi farmonni imzoladi. Tegishli farmon prezident saytida e’lon qilingan.
27-iyul kuni Ukraina Oliy Radasi Andrey Kostin nomzodini qo‘llab-quvvatladi. Kostinning tayinlanishini yoqlab 299 deputat ovoz berdi.
“Strana.ua” xabariga ko‘ra, Andrey Kostin ish boshlaganidan so‘ng darhol Korrupsiyaga qarshi ixtisoslashtirilgan prokuraturaning yangi rahbarini tasdiqlagan. Ushbu lavozimni Ukrainaning Korrupsiyaga qarshi kurash milliy byurosi sobiq tergovchisi Aleksandr Klimenko egalladi.
49 yoshli Andrey Kostin Odessada tug‘ilgan. 2019-yilda u “Xalq xizmatkori” partiyasidan Ukraina xalq deputati etib saylangan. U Oliy Radaning Huquqiy siyosat bo‘yicha qo‘mitasi rahbari lavozimida ishlagan va parlamentda sud-huquq islohotlari uchun mas’ul bo‘lgan.
Eslatib o‘tamiz, iyul oyi o‘rtalarida Vladimir Zelenskiy Irina Venediktovani bosh prokuror lavozimidan, bolalikdagi do‘sti Ivan Bakanovni esa Ukraina Xavfsizlik xizmati rahbari lavozimidan ozod qilgan edi.
Izoh (0)