Xitoylik olimlar Uxan shahridagi qon bankidan o‘n minglab namunalarni o‘rganmoqchi. Bu haqda XXR sog‘liqni saqlash organlariga tayanib, CNN xabar berdi. COVID-19 birinchi marta Uxanda tarqalgan deb hisoblanadi.

Foto: Getty Images

2020-yilning fevral oyida Jahon sog‘liqni saqlash tashkiloti tadqiqotchilari guruhi yangi koronavirusga qarshi antitanalar bo‘lishi mumkin bo‘lgan 200 mingga yaqin qon namunasini aniqlagan edi, ular orasida 2019-yilning so‘nggi oylarida yig‘ilganlari ham bor.

Infeksiyaga eng birinchi chalinish holati rasman 2019-yil 8-dekabrda qayd etilgan, ammo ko‘plab olimlarning fikricha, koronavirus odamlar orasida oktabr—noyabr oylarida tarqalgan.

Namunalar Uxan qon markazida saqlanadi. Xitoy hukumati ularni ikki yil davomida ko‘rikdan o‘tkazib bo‘lmasligini aytgan, chunki ular qon topshirish bilan bog‘liq sud ishlarida dalil sifatida kerak bo‘lishi mumkin. 2019-yilning kuzida olingan namunalarni tekshiruvsiz saqlash muddati tez orada tugaydi. Xitoy Milliy sog‘liqni saqlash komissiyasi vakilining aytishicha, tadqiqotga tayyorgarlik ishlari olib borilmoqda, namunalarning ikki yillik muddati tugagandan keyin tekshiruv boshlanadi.

Kolumbiya universitetining epidemiolog dotsenti Morin Miller CNN’ga bergan intervyusida, namunalar tarkibida muhim hayotiy ma’lumotlar saqlanib qolishini aytdi. U Xitoyni chet ellik malakali mutaxassislar uchun tadqiqot jarayonini kuzatishga ruxsat berishga chaqirdi. Aks holda Xitoy xabar qilgan natijalarga hech kim ishonmaydi, dedi Miller.

Vanderbilt universiteti tibbiyot maktabi professori Uilyam Shaffner qon namunalari bilan bog‘liq ikkita ehtimoliy qiyinchilik haqida gapirdi: ularning haqiqiyligi va tegishliligi. Uning so‘zlariga ko‘ra, donorlar odatda sog‘lom odamlar bo‘ladi, ularda aksariyat hollarda COVID-19 simptomsiz o‘tadi. Shaffner, shuningdek, JSST ekspertlari mustaqil tadqiqot o‘tkazishi uchun namunalarni Jenevaga yoki boshqa neytral joyga yetkazib berishni ma’qulladi.

Xitoyda COVID-19 ga chalinish bo‘yicha ilk holat 2019-yil dekabr oyida rasman aniqlangan va kasallik paydo bo‘lishi Uxandagi dengiz mahsulotlari bozori bilan bog‘langan. Mart oyi oxirida Xitoy va Jahon sog‘liqni saqlash tashkiloti tomonidan chop etilgan hamkorlikdagi tadqiqotga ko‘ra, odamlarda vaqti-vaqti bilan tarqaladigan infeksiyalar Uxandagi koronavirus avj olishidan oldin ham bo‘lgan.

G‘arb davlatlari Xitoyni koronavirusning kelib chiqishi bo‘yicha xalqaro tekshiruvda hamkorlik qilishdan bosh tortgani uchun tanbeh bermoqda. Pekin bu ayblovlarni bir necha bor rad etgan.