Хитойнинг Ухань шаҳри ҳукумати тўрт кишида коронавирус аниқланганидан кейин шаҳарнинг қарийб 1 миллион аҳоли яшайдиган бутун бир туманини карантинга ёпди, деб ёзади Meduza.
Аҳолини мунтазам тестдан ўтказиш доирасида икки бемор аниқланган бўлса, яна икки киши уларнинг яқин ижтимоий алоқалари қаторида бўлиб чиқди. Касаллик ҳаммада енгил шаклда, симптомларсиз кечмоқда.
Карантин 27 июлдан бошлаб уч кунга киритилди. Тумандаги барча умумий овқатланиш корхоналари, диний муассасалар, кинотеатрлар, бозорлар ёпилди, жамоат транспорти ҳаракати тўхтатилди.
Касаллик юқтириш эҳтимоли «юқори» деб баҳоланган тўртта даҳада эса умуман уйдан чиқиш тақиқланди. Туманнинг қолган аҳолисидан эса ҳаётий аҳамиятга эга зарурат бўлмаса, уйни тарк этмаслик сўралмоқда.
Ухань 2019 йил охирида коронавирус аниқланган дунёдаги илк шаҳарга айланганди. 2020 йил баҳорида бутун шаҳар икки ойга локдаунга ёпилди, бу касаллик тарқалиши даражасини тезкорлик билан нолгача тушириш имконини берди — Европада коронавируснинг биринчи тўлқини энди бошланган пайтда шаҳар нормал ҳаёт тарзига қайтиб бўлганди.
Дунёдаги аксарият мамлакатлардан фарқли ўлароқ, Хитойда ҳалигача коронавирусга нисбатан «ноль бардошлилик» сиёсати олиб борилмоқда — уни кекса одамлар орасида вакцинация даражаси пастлиги билан изоҳлашмоқда. Мамлакатга чет элликлар кириши ҳамон қатъий чекланган.
Аввалроқ Хитойнинг Ухань университетида вабо (холера) билан касалланиш бўйича битта ҳолат аниқланган эди, бемор касалхонага ётқизилгач, унинг аҳволи барқарорлашган, инфекция симптомлари ўтиб кетган.
Изоҳ (0)