Sprite ekologiya sababli yashil idishlardan voz kechishga qaror qildi

Coca Cola 1-avgustdan boshlab Sprite’ning qadoqlanish jarayonida yashil rangdan foydalanilmasligini, u shaffof plastikka o‘zgartirilishini aytdi. Bu haqda CNN xabar bermoqda.

Bu ekologik mas’uliyatni oshirishga qaratilgan keng qamrovli sa’y-harakatlarning bir qismi sifatida ko‘rilmoqda.

Sprite’ning hozirgi plastmassasida yashil polietilen tereftalat (PET) mavjud bo‘lib, u plastikning qayta ishlanish xususiyatini yo‘q qiladi.

Butilkalarda ranglardan foydalanmaslik qayta ishlangan materialning sifatini yaxshilaydi, — dedi R3CYCLE plastik guruhi bosh direktori Julian Ochoa.

Shuningdek, Sprite’ning logotipi va qadoqlash dizayni ham o‘zgaradi. Mashhur yashil rang esa endilikda faqat Sprite yorliqlarida qo‘llanadi.

Coca-Cola ko‘pincha atrof-muhitga zarar yetkazuvchi plastik chiqindilarga hissa qo‘shgani uchun tanqid qilinadi.

2020-yilda kompaniya Break Free From Plastic ekologik firmasi tomonidan dunyodagi 1-raqamli plastik orqali ifloslanishga hissa qo‘shuvchi kompaniya deb topilgan.