Walmart korporatsiyasi foyda bo‘yicha prognozlarini pasaytirganidan so‘ng Uoltonlar oilasining boyligi 11,4 mlrd dollardan ko‘proqqa qisqardi. Bu haqda Bloomberg xabar bermoqda.
Uoltonlar oilasi tomonidan boshqariladigan Walmart chakana savdo tarmog‘idagi aksiyalar AQSH savdolarida daromadlari taxminlardan ancha past bo‘lganidan keyin 7,6 foizga tushib ketdi. Ko‘tarilgan inflyatsiya chakana gigantning foyda marjasiga bosim o‘tkazdi.
Foyda marja — kompaniya umumiy daromadidagi foydaning ulushi.
Walmart asoschisi, marhum Sem Uolton o‘z biznesini chegirma tamoyillari asosida boshqargan, bu esa o‘tmishdagi inqiroz davrida kompaniya aksiyalarini ko‘paytirishga yordam bergan.
Uoltonning uch farzandi, Elis, Jim, Rob, kelini Kristi va uning o‘g‘li Lukas aksiyalarning deyarli yarmiga egalik qiladi va Bloomberg Billionaires Index ma’lumotlariga ko‘ra, ularning umumiy boyligi taxminan 285 mlrd dollarni tashkil qiladi.
Ma'lumotlarga ko‘ra, Walmart va AQSHning boshqa chakana gigantlari so‘nggi 40 yildagi eng yuqori inflyatsiya sharoitida xaridorlarning kiyim-kechak va boshqa tovarlarni kam sotib olayotganidan zarar ko‘rmoqda.
Avvalroq Walmart asoschisi Sam Uoltonning yagona qizi Elis Uolton dunyoning eng boy ayollari reytingida ikkinchi o‘rinda ekanligi haqida xabar berilgan edi.
Izoh (0)