Olimlar Grenlandiyada havo haroratining oshishi tufayli uch kun ichida orolning 18 milliard tonna muz qatlami erib ketgani haqida ogohlantirdi. Bu haqda “Phycs.org” xabar berdi.
Tadqiqotchilarning fikriga ko‘ra, asosan, Grenlandiya shimolidagi muzliklar erib ketgan, bunga Kanadaning arktik arxipelagidan iliq havo ko‘chishi sabab bo‘lgan. O‘tgan dam olish kunlari havo harorati yilning shu davriga nisbatan me’yordan 5 darajaga issiq bo‘lgani xabar qilingandi.
“Biz Grenlandiyada so‘nggi yillarda juda ko‘p issiqlik to‘lqinlarini qayd etdik, so‘nggi isish bunga misol. Muzning haroratidan yuqori bo‘lgan har qanday harorat sirtning ma’lum miqdorda erishiga olib kelishi mumkin”, — deya tushuntirdi Atmosfera tadqiqotlari milliy markazining iqlim va global dinamika laboratoriyasi katta ilmiy xodimi Uilyam Lipskomb.
Qor va muzliklar bo‘yicha ma’lumotlarni ishlash milliy markazi eksperti Ted Skambosning so‘zlariga ko‘ra, hafta oxirida muzliklarning yanada ko‘proq erishi kutilmoqda.
“Biz okeanga taxminan 100 milliard tonna suv tushishini taxmin qilyapmiz. Umuman Grenlandiya har yili katta miqdorda muz yo‘qotmoqda”, — dedi u.
Olimlarning ta’kidlashicha, so‘nggi yigirma yil ichida Grenlandiyada muzning erishi yiliga 200 milliard tonnani tashkil etgan. Dengiz sathining halokatli ko‘tarilishiga yo‘l qo‘ymaslik uchun hali vaqt bor, deydi ular, lekin har yili issiqxona gazlari chiqindilarini chiqarish hozirgi sur’atida davom etsa, kelajakda jiddiy muammolar yuzaga kelishi ehtimoli ortadi.
Izoh (0)