Qozog‘iston prezidenti Qosim-Jo‘mart To‘qayev Makka shahrida Umra ziyoratini amalga oshirdi. Bu haqda davlat rahbari matbuot xizmatining Telegram-kanalida xabar berildi.
Xabarga ko‘ra, To‘qayev Ka’baning ichiga ham kirgan — uning eshiklari faqat alohida hollarda hurmatli mehmonlar uchun ochiladi.
“Bu Saudiya Arabistoni rahbariyatining Qozog‘iston rahbariga nisbatan chuqur hurmatidan dalolatdir”, — deyiladi xabarda.
To‘qayev Saudiya Arabistoniga mamlakatning valiahd shahzodasi Muhammad bin Salmon al Saud bilan savdo-iqtisodiy hamkorlikni muhokama qilish uchun tashrif buyurgan. Muzokaralar chog‘ida tomonlar o‘zaro savdo hajmini oshirish niyatini tasdiqlagan.
Valiahd shahzoda Saudiya kompaniyalarining Qozog‘iston qishloq xo‘jaligi sohasiga sarmoya kiritishdan manfaatdor ekanligini ma’lum qildi, deyiladi Qozog‘iston prezidenti matbuot xizmati xabarida.
Eslatib o‘tamiz, iyun oyi boshida Turkmaniston prezidenti Serdar Berdimuhamedov ham Umra ziyoratini amalga oshirgan edi. Unga safarda o‘g‘li Kerimguli hamrohlik qilgan. Turkmaniston prezidentining otasi — Gurbanguli Berdimuhamedov 2016-yil mayida Umra ziyoratini amalga oshirgan edi (shundan keyin davlat OAVlari uning nomiga “hoji” so‘zini qo‘shib yozadigan bo‘ldi).
Izoh (0)