Bagama orollari, shuningdek, Britaniyaga qarashli Gernsi va Meyn orollari Rossiyaning “do‘st bo‘lmagan” davlatlar va hududlar ro‘yxatiga kiritildi. Tegishli xabar Rossiya hukumati saytida e’lon qilingan.
Bagama orollarining ushbu ro‘yxatga kiritilganiga sabab hudud Rossiya Moliya vazirligi va Markaziy banki bilan har qanday operatsiyalarni taqiqlagan edi. Gernsi va Meyn esa Buyuk Britaniya tomonidan Rossiyaga qarshi kiritilgan sanksiyalarni qo‘llab-quvvatlagan.
Rossiyada “do‘st bo‘lmagan davlatlar” ro‘yxati 2021-yildan tuzila boshladi. Dastlab uning tarkibiga AQSH va Chexiya kirdi.
Ukrainada urush boshlanib, sanksiyalar qo‘llanilgandan so‘ng, Yevropa Ittifoqining barcha a’zolari, shuningdek, Rossiyaga qarshi sanksiyalarni qo‘llab-quvvatlagan Yaponiya, Avstraliya, Yangi Zelandiya, Ukraina va boshqa ba’zi davlatlar ham ushbu ro‘yxatga qo‘shildi.
“Do‘st bo‘lmagan” mamlakatlar uchun diplomatik vakolatxonalarida Rossiya fuqarolarini ishga yollash imkoniyati cheklangan. Bundan tashqari, Rossiyaning jismoniy va yuridik shaxslari “do‘st bo‘lmagan” mamlakatlarning kreditorlari bilan kredit shartnomalarida ko‘rsatilgan valyutada emas, balki rublda hisob-kitob qilishi mumkin.
Mavzuga doir: Rossiya Yevropaning yana 5 mamlakatini “do‘st bo‘lmagan” davlatlar ro‘yxatiga kiritdi
Izoh (0)