Қозоғистон президенти Қосим-Жўмарт Тўқаев Макка шаҳрида Умра зиёратини амалга оширди. Бу ҳақда давлат раҳбари матбуот хизматининг Telegram-каналида хабар берилди.
Хабарга кўра, Тўқаев Каъбанинг ичига ҳам кирган — унинг эшиклари фақат алоҳида ҳолларда ҳурматли меҳмонлар учун очилади.
«Бу Саудия Арабистони раҳбариятининг Қозоғистон раҳбарига нисбатан чуқур ҳурматидан далолатдир», — дейилади хабарда.
Тўқаев Саудия Арабистонига мамлакатнинг валиаҳд шаҳзодаси Муҳаммад бин Салмон ал Сауд билан савдо-иқтисодий ҳамкорликни муҳокама қилиш учун ташриф буюрган. Музокаралар чоғида томонлар ўзаро савдо ҳажмини ошириш ниятини тасдиқлаган.
Валиаҳд шаҳзода Саудия компанияларининг Қозоғистон қишлоқ хўжалиги соҳасига сармоя киритишдан манфаатдор эканлигини маълум қилди, дейилади Қозоғистон президенти матбуот хизмати хабарида.
Эслатиб ўтамиз, июнь ойи бошида Туркманистон президенти Сердар Бердимуҳамедов ҳам Умра зиёратини амалга оширган эди. Унга сафарда ўғли Керимгули ҳамроҳлик қилган. Туркманистон президентининг отаси — Гурбангули Бердимуҳамедов 2016 йил майида Умра зиёратини амалга оширган эди (шундан кейин давлат ОАВлари унинг номига «ҳожи» сўзини қўшиб ёзадиган бўлди).
Изоҳ (0)