Mamlakatda davom etayotgan jazirama o‘zbekistonliklarning mehnat qilib daromad topishiga, tirikchilik qilishiga xalal bermayapti. Bu haqda “Daryo” muxbirlari xabar berdi.
“Daryo”ning Namangan viloyatidagi muxbiri Azizbek Abduvaliyevning xabar berishicha, bugun tush paytida Namanganda 41 daraja issiq bo‘lgan. Shunga qaramasdan namanganlik novvoylar issiq tandir oldida mazali va to‘yimli non pishirishda davom etgan.
Namanganlik novvoylar yozning hozirgidek jazirama kunlarida ham bir zum tin olayotgani yo‘q, qo‘li qo‘liga tegmaydi. Tashqaridagi harorat 41 daraja bo‘lsa-da, tandir ichidagi harorat undan ikki baravar ortiq bo‘lsa borki, aslo kam emas.
Biz suhbatlashgan novvoylar “bunday jaziramada tandir ichiga kirish u yoqda tursin, ko‘chada yurish ham amrimahol bo‘lib qoldi, bunga qanday chidayapsizlar?” degan savolga javoban “savobli kasbning etagini tutganmiz, dasturxonga non ushatganda bizni duo bilan eslashsa, bas” deyishdi jilmayib.
Ma’lumot uchun, novvoylar qaynoq tandirga kamida ikki marotaba — nonni yopishtirayotganda va tayyor bo‘lganidan so‘ng uzib olish uchun kirib-chiqadi.
“Daryo”ning Buxoro viloyatidagi muxbiri Laylo Hayitova ham tirikchilik sababli jazirama oftob tig‘ida qo‘lbola soyabonlardan foydalanib, savdo qilayotganlar bilan suhbatlashdi.
“Kun tig‘ida vagon-do‘kon ichida harorat juda baland bo‘ladi, issiqligini ko‘rib turibsiz. Bu mahsulotlarning sifatsiz bo‘lishiga olib keladi. Shu bois ozgina bo‘lsa-da, ko‘chadan shamol istab, vagon tashqarisiga mahsulotlarni chiqarib qo‘yamiz. Bu issiqda odamlarning jon saqlashi qiyin bo‘lyapti. Lekin tirikchilik vaji bilan jazirama issiqqa qaramay, ishlayapmiz. Oila boqish, ro‘zg‘or tebratish kerak”, — deydi Kamoliddin G‘iyosov.
Jaziramada quyosh tig‘ida mehnat qilayotgan Obodonlashtirish bo‘limi xodimi issiq va suvsizlik sabab mehnati samarasiz bo‘layotganini aytmoqda.
“Shu gullar har ikki kunning birida sug‘oriladi, ammo foydasiz. Bir tomondan haroratning keskin ko‘tarilgani, ikkinchi tomondan Buxoro tuprog‘ining sho‘rligi mehnatimizni natijasiz qoldirmoqda. Achinamiz, ammo qo‘limizdan hech narsa kelmaydi”, — deydi Obodonlashtirish bo‘limi xodimlari katta ko‘chadagi gulzorlar haqida gapirar ekan.
66 yoshli onaxon esa issiq uning tirikchilik qilishiga, ishlashiga xalal bermayotganini ta’kidlamoqda.
“Yozning issig‘i bor, qishning sovug‘i bor, non yeyish kerakmi, demak, savdo qilib o‘tiraman-da. Majburman. Shunga o‘rganganman. Topganim nonga yetsin, shunga shukr qilaman”, — deydi 66 yoshli onaxon Olima Ahmedova.
Ayolning aytishicha, u panoh topgan daraxt ham soat 10:00 lardan keyin o‘z soyasini quyosh tig‘iga almashadi. Bunday paytda u ro‘molidan boshiga soyabon sifatida foydalanadi.
“Nafaqat yo‘l chekkalarida o‘tirib, tirikchilik qilayotganlarga, turli korxona-tashkilotlarda ishchi-xodimlarga ham qiyin. Siz jurnalist bo‘lsangiz, me’yordan ortiq haroratda jon saqlayotgan aholi uchun kompensatsiya to‘lanishi shartligi masalasini olib chiqing. Bu issiq shunchaki, issiqmas, yomon issiq. Havo harorati Sog‘liqni saqlash vazirligi belgilagan me’yorlardan judayam oshib ketdi. Unga ko‘ra, kunduzi 32 darajadan, kechki payt 24 darajadan oshmasligi kerak. Anomal issiq harorat payti ko‘chaga chiqmang, ko‘proq salqin joylarda bo‘ling, deyishadi-yu, bunga ishchi-xodimlar uchun na imkon, na sharoit yaratib berishadi”, — deydi peshonasidan oqayotganlar terlarni artgan suhbatdosh.
“Daryo”ning Andijon viloyatidagi muxbiri Umidjon Mamarasulovning ma’lumot berishicha, bugun Andijonda avvalgi kunlarga qaraganda biroz salqin bo‘lgan.
Muxbir Umidjon Mamarasulov jazirama issiqda faoliyat yuritayotgan YPX inspektori faoliyatini kuzatdi va tasvirga oldi.
“To‘g‘ri, havo harorati keskin ko‘tarildi. Ammo ishlash, tirikchilikni davom ettirish kerak-ku”, — deydi “Daryo” muxbiri bilan suhbatlashgan aholi vakillaridan biri.
“Daryo” jazirama issiqda tirikchilik qilayotganlar hayotini kuzatishda davom etadi.
Izoh (0)