Samarqand viloyati Samarqand tumanida 18-iyul kuni uchta mashina ishtirokida yo‘l-transport hodisasi sodir bo‘ldi. Bu haqda viloyat Ichki ishlar boshqarmasi xabar qildi.
Qayd etilishicha, holat shu kuni soat 23:00 larda A-378 avtomobil yo‘lining Samarqand tumani hududidan o‘tuvi 12-kilometrida yuz bergan. Qayrilib olayotgan Lacetti mashinasiga Qashqadaryo viloyatidan harakatlanib kelayotgan Isuzu yuk mashinasi kelib urilgan va uni qarama-qarshi yo‘nalishga o‘tkazib yuborgan.
Shu payt ro‘paradan kelayotgan “KamAZ” yuk mashinasi Lacetti mashinasiga urilgan va uni surib ketib, yo‘lni ajratib turuvchi beton to‘siq ustiga chiqib ketgan. Lacetti esa uning ostida qolgan.
YTH oqibatida Lacetti haydovchisi og‘ir tan jarohatlari olib, voqea joyida halok bo‘lgan. “KamAZ” va Isuzu haydovchilari ham turli darajada tan jarohatlari bilan shifoxonaga yotqizilgan.
Holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)