Jizzax viloyati G‘allaorol tumanida Nexia mashinasi haydovchisi piyodani urib, voqea joyidan qochib ketdi. Bu haqda viloyat IIB xabar berdi.
Viloyat IIBga noma’lum mashina yo‘lni kesib o‘tayotgan piyodani urib yuborib, qochib ketgani haqida xabar kelib tushgan. Hodisa yuz bergan joyga zudlik bilan IIB xodimlari yetib borganida jabrlanuvchi G‘allaorol tumani “Baxt” mahallasida yashovchi, 1953-yilda tug‘ilgan fuqaro ekani va u og‘ir tan jarohatlari olib, vafot etgani ma’lum bo‘lgan.
Shundan so‘ng viloyat bo‘ylab piyodani urib qochib ketgan haydovchiga qidiruv e’lon qilingan. Olib borilgan surishtiruvlar davomida mazkur jinoyatni Zarbdor tumani “Nurobod” mahallasida yashovchi, 1999-yilda tug‘ilgan shaxs o‘z boshqaruvidagi Nexia mashinasi bilan sodir etgani aniqlangan.
Haydovchi avvaliga piyodani urib yuborganini tan olmagan. Ammo mashina tekshirib ko‘rilganda uning old qismida zarba izlari borligi ma’lum bo‘lgan. Qayd etilishicha, holat yuzasidan G‘allaorol tumani IIB tomonidan jinoyat ishi qo‘zg‘atilib, hozirda dastlabki tergov harakatlari olib borilmoqda.
Izoh (0)