Ijtimoiy tarmoqlarda 24-iyul kuni Toshkent viloyati Yangiyo‘l tumanida YTH sodir bo‘lgani yuzasidan video tarqalgandi. Tuman ichki ishlar bo‘limi “Daryo” so‘roviga ko‘ra voqea tafsilotlarini ma’lum qildi.

Qayd etilishicha, soat taxminan 09:00 da Yangiyo‘l tumani “Qo‘shyog‘och” MFY hududidan o‘tuvchi 4R-22 yo‘lining 53-kilometrida haydovchi — 2000-yilda tug‘ilgan A.I. boshqaruvida bo‘lgan Nexia avtomobil o‘ziga nisbatan qarama-qarshi tomondan harakatlanib kelayotgan haydovchi — 1967-yilda tug‘ilgan O‘.T. boshqaruvida bo‘lgan Isuzu rusumli (MCHJga tegishli) avtobus bilan to‘qnashishi oqibatida YTH sodir bo‘lgan.

Nexia haydovchisi A.I. olgan og‘ir tan jarohati oqibatida voqea joyida vafot etgan. Isuzu avtobus yo‘lovchisi — 1990-yilda tug‘ilgan L.R. (ayol) tan jarohati bilan shifoxonaga murojaat qilgan. Hozirda mazkur holat yuzasidan Toshkent viloyati IIBB YHXB tomonidan surishtiruv ishlari olib borilmoqda.