Мамлакатда давом этаётган жазирама ўзбекистонликларнинг меҳнат қилиб даромад топишига, тирикчилик қилишига халал бермаяпти. Бу ҳақда «Дарё» мухбирлари хабар берди.
«Дарё»нинг Наманган вилоятидаги мухбири Азизбек Абдувалиевнинг хабар беришича, бугун туш пайтида Наманганда 41 даража иссиқ бўлган. Шунга қарамасдан наманганлик новвойлар иссиқ тандир олдида мазали ва тўйимли нон пиширишда давом этган.
Наманганлик новвойлар ёзнинг ҳозиргидек жазирама кунларида ҳам бир зум тин олаётгани йўқ, қўли қўлига тегмайди. Ташқаридаги ҳарорат 41 даража бўлса-да, тандир ичидаги ҳарорат ундан икки баравар ортиқ бўлса борки, асло кам эмас.
Биз суҳбатлашган новвойлар «бундай жазирамада тандир ичига кириш у ёқда турсин, кўчада юриш ҳам амримаҳол бўлиб қолди, бунга қандай чидаяпсизлар?» деган саволга жавобан «савобли касбнинг этагини тутганмиз, дастурхонга нон ушатганда бизни дуо билан эслашса, бас» дейишди жилмайиб.
Маълумот учун, новвойлар қайноқ тандирга камида икки маротаба — нонни ёпиштираётганда ва тайёр бўлганидан сўнг узиб олиш учун кириб-чиқади.
«Дарё»нинг Бухоро вилоятидаги мухбири Лайло Ҳайитова ҳам тирикчилик сабабли жазирама офтоб тиғида қўлбола соябонлардан фойдаланиб, савдо қилаётганлар билан суҳбатлашди.
«Кун тиғида вагон-дўкон ичида ҳарорат жуда баланд бўлади, иссиқлигини кўриб турибсиз. Бу маҳсулотларнинг сифатсиз бўлишига олиб келади. Шу боис озгина бўлса-да, кўчадан шамол истаб, вагон ташқарисига маҳсулотларни чиқариб қўямиз. Бу иссиқда одамларнинг жон сақлаши қийин бўляпти. Лекин тирикчилик важи билан жазирама иссиққа қарамай, ишлаяпмиз. Оила боқиш, рўзғор тебратиш керак», — дейди Камолиддин Ғиёсов.
Жазирамада қуёш тиғида меҳнат қилаётган Ободонлаштириш бўлими ходими иссиқ ва сувсизлик сабаб меҳнати самарасиз бўлаётганини айтмоқда.
«Шу гуллар ҳар икки куннинг бирида суғорилади, аммо фойдасиз. Бир томондан ҳароратнинг кескин кўтарилгани, иккинчи томондан Бухоро тупроғининг шўрлиги меҳнатимизни натижасиз қолдирмоқда. Ачинамиз, аммо қўлимиздан ҳеч нарса келмайди», — дейди Ободонлаштириш бўлими ходимлари катта кўчадаги гулзорлар ҳақида гапирар экан.
66 ёшли онахон эса иссиқ унинг тирикчилик қилишига, ишлашига халал бермаётганини таъкидламоқда.
«Ёзнинг иссиғи бор, қишнинг совуғи бор, нон ейиш керакми, демак, савдо қилиб ўтираман-да. Мажбурман. Шунга ўрганганман. Топганим нонга йэтсин, шунга шукр қиламан», — дейди 66 ёшли онахон Олима Аҳмедова.
Аёлнинг айтишича, у паноҳ топган дарахт ҳам соат 10:00 лардан кейин ўз соясини қуёш тиғига алмашади. Бундай пайтда у рўмолидан бошига соябон сифатида фойдаланади.
«Нафақат йўл чеккаларида ўтириб, тирикчилик қилаётганларга, турли корхона-ташкилотларда ишчи-ходимларга ҳам қийин. Сиз журналист бўлсангиз, меъёрдан ортиқ ҳароратда жон сақлаётган аҳоли учун компенсация тўланиши шартлиги масаласини олиб чиқинг. Бу иссиқ шунчаки, иссиқмас, ёмон иссиқ. Ҳаво ҳарорати Соғлиқни сақлаш вазирлиги белгилаган меъёрлардан жудаям ошиб кетди. Унга кўра, кундузи 32 даражадан, кечки пайт 24 даражадан ошмаслиги керак. Аномал иссиқ ҳарорат пайти кўчага чиқманг, кўпроқ салқин жойларда бўлинг, дейишади-ю, бунга ишчи-ходимлар учун на имкон, на шароит яратиб беришади», — дейди пешонасидан оқаётганлар терларни артган суҳбатдош.
«Дарё»нинг Андижон вилоятидаги мухбири Умиджон Мамарасуловнинг маълумот беришича, бугун Андижонда аввалги кунларга қараганда бироз салқин бўлган.
Мухбир Умиджон Мамарасулов жазирама иссиқда фаолият юритаётган ЙПХ инспектори фаолиятини кузатди ва тасвирга олди.
«Тўғри, ҳаво ҳарорати кескин кўтарилди. Аммо ишлаш, тирикчиликни давом эттириш керак-ку», — дейди «Дарё» мухбири билан суҳбатлашган аҳоли вакилларидан бири.
«Дарё» жазирама иссиқда тирикчилик қилаётганлар ҳаётини кузатишда давом этади.
Изоҳ (0)