24-iyul kuni Shavkat Mirziyoyev va Turkmaniston Milliy Kengashi Xalq maslahati raisi Gurbanguli Berdimuhamedov o‘rtasida telefon orqali muloqot bo‘lib o‘tdi. Bu haqda Prezident matbuot xizmati xabar qildi.
Qayd etilishicha, Xalq maslahati raisi Turkmaniston prezidenti Serdar Berdimuhamedov va turkman xalqi nomidan O‘zbekiston rahbarini tug‘ilgan kuni bilan tabriklagan. O‘zbekiston—Turkmaniston do‘stlik, yaxshi qo‘shnichilik va strategik sheriklik munosabatlarini mustahkamlash masalalari muhokama qilingan.
Joriy yil 14—15-iyul kunlari O‘zbekistonga amalga oshirilgan oliy darajadagi tashrifning samarali yakunlari yuqori baholangan. Qabul qilingan yo‘l xaritasi asosida erishilgan kelishuvlarni, shu jumladan, Sanoat kooperatsiyasi bo‘yicha o‘rta muddatli dasturni, Chegaraoldi savdo zonasini tashkil etish loyihasini, birinchi Hududlar forumi va Ishbilarmonlar kengashi yakunida imzolangan savdo shartnomalari va bitimlarini amalga oshirish muhimligi ta’kidlangan.
Samarali yo‘lga qo‘yilgan parlamentlararo muloqot doirasida olib borilayotgan faol aloqalar va almashinuvlar alohida qayd etilgan. Mintaqaviy kun tartibi yuzasidan ham fikr almashilgan. Jumladan, joriy yil noyabr oyida Samarqand shahrida Turkiy davlatlar tashkilotining sammitini o‘tkazish masalalari ko‘rib chiqilgan.
Bundan tashqari, shu kuni Shavkat Mirziyoyev Ozarbayjon prezidenti Ilhom Aliyev bilan ham telefon orqali muloqot qilgan. Ozarbayjon yetakchisi ham O‘zbekiston rahbarini tavallud kuni bilan samimiy qutlab, O‘zbekiston xalqiga farovonlik va ravnaq tilagan.
Prezidentlar joriy yil 21—22-iyun kunlari O‘zbekistonda o‘tgan oliy darajadagi ikki tomonlama uchrashuv va tadbirlarning sermahsul natijalarini yuqori baholagan. Muzokaralar yakunida qabul qilingan bitim va kelishuvlarni amalga oshirish masalalari muhokama qilingan.
Hukumatlar va idoralar darajasida faol muloqotlar va almashinuvlar davom etayotgani, o‘zaro tovar ayirboshlashning o‘sish sur’atlari yuqori va barqaror ekani, kooperatsiya loyihalarini ilgari surish bo‘yicha birgalikda samarali ishlanayotgani alohida qayd etilgan.
Shuningdek, bo‘lajak ikki va ko‘p tomonlama tadbirlarga, shu jumladan, shu yili noyabr oyida Samarqandda o‘tkaziladigan Turkiy davlatlar tashkilotining sammitiga tayyorgarlik ko‘rish masalalari ko‘rib chiqilgan.
Izoh (0)