Qozog‘iston va Qirg‘iziston rahbarlari ham Shavkat Mirziyoyevni tug‘ilgan kuni bilan tabrikladi

24-iyul kuni Shavkat Mirziyoyevning Qozog‘iston prezidenti Qosim-Jo‘mart To‘qayev va Qirg‘iziston prezidenti Sadir Japarov bilan telefon orqali muloqoti bo‘lib o‘tdi. Bu haqda Prezident matbuot xizmati xabar qildi.

Qayd etilishicha, To‘qayev suhbat avvalida O‘zbekiston rahbarini tavallud kuni bilan tabriklagan.

O‘zbekiston va Qozog‘iston o‘rtasidagi strategik sheriklik va ittifoqchilik munosabatlarini mustahkamlash, ko‘p qirrali hamkorlikni kengaytirish masalalari ko‘rib chiqilgan. Savdo va logistika, sanoat va agrosanoat sohalarida kooperatsiya loyihalarini jadallashtirish muhimligi qayd etilgan. O‘zbekiston va Qozog‘iston hukumatlari darajasida yaqindan aloqalarni davom ettirishga kelishib olingan.

Mintaqaviy ahamiyatga molik dolzarb masalalar yuzasidan ham fikr almashilgan. Shu hafta Qirg‘izistonda o‘tgan Markaziy Osiyo davlatlari rahbarlarining navbatdagi Maslahat uchrashuvining samarali natijalari yuqori baholangan.

Mintaqada yirik infratuzilmaviy loyihalarni tez fursatda tayyorlash va amalga oshirishni boshlash masalalariga alohida e’tibor qaratilgan.

Shuningdek, Sadir Japarov ham O‘zbekiston rahbarini tug‘ilgan kuni bilan tabriklab, O‘zbekiston xalqiga tinchlik-osoyishtalik, farovonlik va ravnaq tilagan.

Bo‘lajak oliy darajadagi uchrashuvlarning kun tartibini tayyorlash masalalari muhokama qilingan. Ikki mamlakat hukumatlari savdo shartnomalari va sanoat kooperatsiyasi bitimlarining yangi to‘plamini, shuningdek, O‘zbekiston—Qirg‘iziston strategik sherikligining ustuvor yo‘nalishlari bo‘yicha boshqa ikki tomonlama hujjatlarni tayyorlashi muhimligi qayd etilgan. Energetika va transport sohalaridagi yirik mintaqaviy loyihalarni ilgari surishga alohida e’tibor qaratilgan.

O‘zbekiston yetakchisi Qirg‘iziston prezidentini joriy yil 20—21-iyul kunlari Cho‘lponota shahrida Markaziy Osiyo davlatlari rahbarlarining navbatdagi Maslahat uchrashuvi muvaffaqiyatli o‘tkazilgani bilan yana bir bor tabriklagan.

Avvalroq Tojikiston prezidenti Emomali Rahmon ham Mirziyoyevni tug‘ilgan kuni bilan qutlagani haqida xabar qilingandi.