24 июль куни Шавкат Мирзиёев ва Туркманистон Миллий Кенгаши Халқ маслаҳати раиси Гурбангули Бердимуҳамедов ўртасида телефон орқали мулоқот бўлиб ўтди. Бу ҳақда Президент матбуот хизмати хабар қилди.
Қайд этилишича, Халқ маслаҳати раиси Туркманистон президенти Сердар Бердимуҳамедов ва туркман халқи номидан Ўзбекистон раҳбарини туғилган куни билан табриклаган. Ўзбекистон—Туркманистон дўстлик, яхши қўшничилик ва стратегик шериклик муносабатларини мустаҳкамлаш масалалари муҳокама қилинган.
Жорий йил 14—15 июль кунлари Ўзбекистонга амалга оширилган олий даражадаги ташрифнинг самарали якунлари юқори баҳоланган. Қабул қилинган йўл харитаси асосида эришилган келишувларни, шу жумладан, Саноат кооперацияси бўйича ўрта муддатли дастурни, Чегараолди савдо зонасини ташкил этиш лойиҳасини, биринчи Ҳудудлар форуми ва Ишбилармонлар кенгаши якунида имзоланган савдо шартномалари ва битимларини амалга ошириш муҳимлиги таъкидланган.
Самарали йўлга қўйилган парламентлараро мулоқот доирасида олиб борилаётган фаол алоқалар ва алмашинувлар алоҳида қайд этилган. Минтақавий кун тартиби юзасидан ҳам фикр алмашилган. Жумладан, жорий йил ноябрь ойида Самарқанд шаҳрида Туркий давлатлар ташкилотининг саммитини ўтказиш масалалари кўриб чиқилган.
Бундан ташқари, шу куни Шавкат Мирзиёев Озарбайжон президенти Илҳом Алиев билан ҳам телефон орқали мулоқот қилган. Озарбайжон етакчиси ҳам Ўзбекистон раҳбарини таваллуд куни билан самимий қутлаб, Ўзбекистон халқига фаровонлик ва равнақ тилаган.
Президентлар жорий йил 21—22 июнь кунлари Ўзбекистонда ўтган олий даражадаги икки томонлама учрашув ва тадбирларнинг сермаҳсул натижаларини юқори баҳолаган. Музокаралар якунида қабул қилинган битим ва келишувларни амалга ошириш масалалари муҳокама қилинган.
Ҳукуматлар ва идоралар даражасида фаол мулоқотлар ва алмашинувлар давом этаётгани, ўзаро товар айирбошлашнинг ўсиш суръатлари юқори ва барқарор экани, кооперация лойиҳаларини илгари суриш бўйича биргаликда самарали ишланаётгани алоҳида қайд этилган.
Шунингдек, бўлажак икки ва кўп томонлама тадбирларга, шу жумладан, шу йили ноябрь ойида Самарқандда ўтказиладиган Туркий давлатлар ташкилотининг саммитига тайёргарлик кўриш масалалари кўриб чиқилган.
Изоҳ (0)