Shri-Lanka qurolli kuchlari mamlakat poytaxtida hukumatga qarshi namoyishchilar tomonidan tashkil etilgan asosiy lagerni yo‘q qilishga kirishdi. Bu haqda Deutsche Welle xabar berdi.
Harbiy kuchlar Kolombodagi hukumatga qarshi namoyishchilarning asosiy lagerida reyd o‘tkazgan. Poytaxtdagi prezident kotibiyati oldida qarorgoh qurgan namoyishchilarga tayoq va pulemyotlar bilan qurollangan askar va maxsus kuchlar hujum qilgan.
Amnesty International tashkilotining Janubiy Osiyodagi vakolatxonasi Twitter’da “Politsiya va harbiylar erta tongda ushbu hududga hujum qilib, uni o‘rab olgani va namoyishchilarni hibsga olganini” aytdi.
Askarlar namoyishchilar tomonidan o‘natilgan va prezident kotibiyati binosining asosiy darvozasini to‘sib turgan barrikadalarni buzib tashladi, deyiladi xabarda.
Namoyish tashkilotchilarining aytishicha, kamida 50 nafar namoyishchi yaralangan, jumladan, bir nechta jurnalist xavfsizlik kuchlari tomonidan kaltaklangan.
Reyddan bir necha soat o‘tib namoyishchilar maydonni tark etdi. Ular yangi Vazirlar Mahkamasi qasamyod qilgandan keyingina binoni topshirishini e’lon qilgandi. Politsiya vakili ularning bu joyni egallashga haqqi yo‘qligini va to‘qqiz kishi hibsga olinganini aytdi.
Eslatib o‘tamiz, o‘tgan hafta norozilik namoyishlari fonida Shri-Lanka sobiq prezidenti Gotabaya Rajapaksa Singapurga qochib ketgan va iste’foga chiqqan. Uning o‘rniga bosh vazir Ranil Vikramasingxe prezident vazifasini bajaruvchi bo‘ldi. Sobiq prezident Gotabay Rajapaksaning safdoshi Dinesh Gunavardena esa Shri-Lanka bosh vaziri etib tayinlandi.
Izoh (0)