Rossiya hukumati Gretsiya, Daniya, Sloveniya, Xorvatiya va Slovakiyani Rossiya hamda rus kompaniyalari va fuqarolariga nisbatan “do‘st bo‘lmagan harakatlarni” amalga oshirayotgan davlatlar ro‘yxatiga kiritdi. Tegishli buyruqni Rossiya hukumati rahbari Mixail Mishustin imzoladi, deyiladi Vazirlar Mahkamasi saytida.
Hukumat xabarida qayd etilishicha, ushbu mamlakatlarning Rossiyadagi diplomatik vakolatxonalarida xodimlar soniga cheklov qo‘yilgan. Xususan, Gretsiya diplomatik vakolatxonalariga 34 nafardan, Daniya 20 nafardan, Slovakiya 16 nafardan ko‘p bo‘lmagan kishini yollashi mumkin bo‘ladi.
“Sloveniya va Xorvatiya o‘z diplomatik vakolatxonalari va konsullik idoralarida xodimlarni yollay olmaydi”, — deyiladi hukumat matbuot xizmati xabarida.
2022-yil mart oyida, Ukraina bilan urush boshlanganidan bir necha kun o‘tib, Rossiya hukumati prezident topshirig‘iga ko‘ra “do‘st bo‘lmagan davlatlar” ro‘yxatini tuzdi. Ro‘yxatga Yevropa Ittifoqining barcha davlatlari, AQSH, Buyuk Britaniya, Yaponiya va 20 ga yaqin boshqa davlatlar kiritilgan.
Mart oyida Rossiya prezidenti Vladimir Putin “do‘st bo‘lmagan” davlatlar Rossiya gazi uchun to‘lovni rublda amalga oshirishi haqida farmon chiqargan.
Izoh (0)