Rossiya qo‘shinlari Xarkovdagi bozor va Kramatorskdagi maktabni o‘qqa tutdi. Tinch aholi orasida qurbonlar ortmoqda. Urushning 148-kunidan fotoreportaj
Rossiya qo‘shinlari Xarkovdagi bozor va uning yonidagi avtobus bekatini o‘qqa tutdi, oqibatda uch kishi halok bo‘ldi (guvohlarning aytishicha, yaradorlardan ba’zilarining tanasi “butunlay kuyib ketgan”). Kramatorskdagi hujumga uchragan maktab vayronalari ostida ikki kishi qolib ketdi, bir kishi halok bo‘ldi. AQSH razvedka idoralari ma’lumotlariga ko‘ra, Ukrainada 15 mingga yaqin rus askari halok bo‘lgan. YIning Rossiyaga qarshi sanksiyalarining yettinchi paketi kuchga kirdi — u Rossiya oltini importiga qisman embargo qo‘yishni nazarda tutadi. Meduza urushning 148-kuniga oid asosiy suratlarini e’lon qildi.
Xarkov
Ukraina askarlari Xarkov viloyatidagi front chizig‘ida M777 gaubitsasidan o‘t ochmoqda. 21-iyun kuni Xarkov rus qo‘shinlari tomonidan o‘qqa tutildi. Viloyat prokuraturasi ma’lumotlariga ko‘ra, raketalar ikki tuman – Saltovskiy (turar joy binosi shikastlangan) va Kiyev (bozor va avtobus bekatiga zarba berilgan) tumanlariga tushgan. 3 kishi halok bo‘ldi, 23 kishi yaralandi.Foto: Reuters
Ukrainaning “Karpatskaya sech” bataloni harbiy xizmatchisi frontda qo‘mondoni bilan ratsiya orqali gaplashmoqda.Foto: AP Photo
Xarkovdagi rus qo‘shinlari tomonidan o‘qqa tutilgan Barabashovo bozori. Hozir bozor vayron bo‘lgan. Guvohlarning BBC’ga aytishicha, voqea joyida yaradorlar ko‘p, ular orasida “tanasi butunlay kuygan” odamlar ham bor.Foto: Anadolu
Tibbiyot xodimlari va politsiya hujumda halok bo‘lgan erkakning jasadi yonida uning rafiqasini tinchlantirmoqda. Bozordan tashqari, Rossiya raketasi uning yaqinidagi avtobus bekatiga ham kelib urilgan.Foto: EPA
Barabashovo bozori o‘qqa tutilganidan keyin yaradorga yordam berayotgan tibbiyot xodimi.Foto: AP Photo
Donbass shimoli
Kramatorskdalik kishi Rossiya raketasi hujumiga uchragan uyidan narsalarni olib chiqmoqda. Britaniya razvedkasi ma’lumotlariga ko‘ra, Rossiya artilleriyasi hamon Kramatorsk va Seversk atrofidagi hududlarda to‘plangan.Foto: Reuters
Kramatorskdagi vayron bo‘lgan maktab yonidan o‘tayotgan odam. Otishma oqibatida kamida bir kishi halok bo‘ldi, yana ikki kishi vayronalar ostida qolgan. Bu haqda Ukraina favqulodda vaziyatlar bo‘yicha davlat xizmati ma’lum qilgan.Foto: EPA
Kramatorskdagi vayron bo‘lgan maktab o‘rnida qutqaruvchilar va harbiylar ishlamoqda.Foto: Reuters
Kramatorsklik 71 yoshli kishi Rossiya harbiylari tomonidan vayron qilingan uyini tark etmoqda.Foto: Reuters
Rossiya o‘qlaridan zarar ko‘rgan Baxmutdagi bozorda yong‘in chiqdi. Halok bo‘lganlar va jarohatlanganlar haqida ma’lumotlar aniqlanmoqda. Urushni o‘rganish instituti mutaxassislarining fikriga ko‘ra, Rossiya Baxmutni qo‘lga kirita olmaydi. Shaharga hujum uchun avvalgi urinishlari muvaffaqiyatsiz tugagan.Foto: EPA
Donetsk viloyatining Kuraxovo shahri yaqinida boshoqli ekin maydonlari yonmoqda. Avvalroq Turkiya hukumati 22-iyul kuni Istanbulda Ukraina donini eksport qilish bo‘yicha kelishuv imzolanishini ma’lum qilgan edi.Foto: AP Photo
Izoh (0)