Шри-Ланка қуролли кучлари мамлакат пойтахтида ҳукуматга қарши намойишчилар томонидан ташкил этилган асосий лагерни йўқ қилишга киришди. Бу ҳақда Deutsche Welle хабар берди.
Ҳарбий кучлар Коломбодаги ҳукуматга қарши намойишчиларнинг асосий лагерида рейд ўтказган. Пойтахтдаги президент котибияти олдида қароргоҳ қурган намойишчиларга таёқ ва пулемётлар билан қуролланган аскар ва махсус кучлар ҳужум қилган.
Amnesty International ташкилотининг Жанубий Осиёдаги ваколатхонаси Twitter’да «Полиция ва ҳарбийлар эрта тонгда ушбу ҳудудга ҳужум қилиб, уни ўраб олгани ва намойишчиларни ҳибсга олганини» айтди.
Аскарлар намойишчилар томонидан ўнатилган ва президент котибияти биносининг асосий дарвозасини тўсиб турган баррикадаларни бузиб ташлади, дейилади хабарда.
Намойиш ташкилотчиларининг айтишича, камида 50 нафар намойишчи яраланган, жумладан, бир нечта журналист хавфсизлик кучлари томонидан калтакланган.
Рейддан бир неча соат ўтиб намойишчилар майдонни тарк этди. Улар янги Вазирлар Маҳкамаси қасамёд қилгандан кейингина бинони топширишини эълон қилганди. Полиция вакили уларнинг бу жойни эгаллашга ҳаққи йўқлигини ва тўққиз киши ҳибсга олинганини айтди.
Эслатиб ўтамиз, ўтган ҳафта норозилик намойишлари фонида Шри-Ланка собиқ президенти Готабая Ражапакса Сингапурга қочиб кетган ва истеъфога чиққан. Унинг ўрнига бош вазир Ранил Викрамасингхе президент вазифасини бажарувчи бўлди. Собиқ президент Готабай Ражапаксанинг сафдоши Динеш Гунавардена эса Шри-Ланка бош вазири этиб тайинланди.
Изоҳ (0)