Suriya poytaxti Damashq osmonida havo hujumidan mudofaa tizimlari Isroil tomonidan yo‘llangan aviazarbalarni qaytardi, deb xabar bermoqda Suriyaning SANA axborot agentligi.
“Isroillik dushmanlar Suriyaning bosib olingan Golan hududidan (Golan tepaliklari, Isroil va Suriya o‘rtasidagi bahsli hudud – “Daryo” izohi.) Damashq shahri yaqinidagi ba’zi nuqtalarga aviazarba berdi, havo hujumidan mudofaa kuchlarimiz bir qancha raketalarni urib tushirdi”, — deyiladi xabarda.
Agentlik ma’lumotlariga ko‘ra, hujum oqibatida uch nafar harbiy halok bo‘lgan, yana yetti kishi yaralangan. Isroil tomoni Suriyaning ushbu bayonotlariga hali izoh bermadi.
Bu Isroilning yaqin orada Damashqqa birinchi hujumi emas. Iyun oyida mamlakat Transport vazirligi Isroil aviazarbasi oqibatida Damashq aeroporti, xususan, navigatsiya yoritgichi bilan jihozlangan uchish-qo‘nish yo‘laklari va binolardan biri shikastlangani haqida xabar bergan edi. Shu sababli havo bandargohi ishi deyarli ikki haftaga to‘xtatilgan.
Izoh (0)