O‘zbekistonda “aqlli” qishloq xo‘jaligi sanoat texnologiyalari innovatsion markazini tashkil etish rejalashtirilmoqda. Bu haqda Qishloq xo‘jaligi vazirligi xabar berdi.
Ushbu loyihaning umumiy qiymati 14 mln AQSH dollari bo‘lishi ko‘zda tutilgan.
Loyihaning maqsadi O‘zbekiston atrof-muhitiga moslashtirilgan aqlli fermer xo‘jaliklarining sanoat texnologiyalarini rivojlantirish markazini barpo etish va bu orqali mamlakatda qishloq xo‘jaligini modernizatsiya qilishdan iborat.
Aqlli qishloq xo‘jaligi sanoat texnologiyalarni sinash uchun Samarqand, Buxoro, Toshkent, Jizzax va Farg‘ona kabi 5 ta viloyatda hududiy sinov xo‘jaliklari ochiladi.
Natijada mamlakatdagi issiqxona uskunalarining importga qaramligi, zamonaviy texnologiyalar ishlab chiqarishda malakali mutaxassislar kamligi, issiqxona va bog‘dorchilik uchun materiallar ishlab chiqarish quvvatlarining yetishmasligi kabi muammolarga yechimlar topiladi.
Bundan tashqari, aqlli fermer xo‘jaligini boshqarish bo‘yicha 2000 nafar mahalliy fermerlarning o‘qitilishi hamda bir qator dizayner arxitektorlar, IT mutaxassislar, yetuk o‘qituvchilarni tayyorlash nazarda tutilgan.
Avvalroq O‘zbekistonda Eronning “innovatsiyalar uyi” ochilishi haqida xabar berilgandi.
Izoh (0)