Moskva arbitraj sudi Shveysariya Credit Suisse kompaniyasining Rossiyadagi aktivlarini hibsga oldi. Bu haqda “Daryo”ga sud qaroridan ma’lum bo‘ldi.
Ta’kidlashicha, 2020-yil noyabr oyida UzAuto Motors va Credit Suisse’ning London filiali o‘rtasida 150 million yevrogacha bo‘lgan xalqaro sindikatlashtirilgan kredit bo‘yicha shartnoma imzolangan.
2021-yilning mart oyida Rossiyaning “Transkapitalbank”i ushbu bitimga qo‘shildi va UzAuto Motors’ga 10 million yevroni taqdim qildi.
Avtomobil ishlab chiqaruvchisi bu qarzni 2022-yil 19-aprelgacha “Transkapitalbank”ka qaytarish uchun Credit Suisse’ga o‘tkazishi kerak edi.
UzAuto Motors buni amalga oshirdi, biroq Credit Suisse pulni “Transkapitalbank”ka o‘tkazmadi (bank 20-aprel kuni AQSH sanksiyalariga tushib qolgan, uning dollar hisoblari muzlatilgan).
“Transkapitalbank” Credit Suisse’ga pullarni UzAuto Motors’ga qaytarish uchun qo‘llanma taqdim qildi (avtomobil ishlab chiqaruvchisi to‘g‘ridan to‘g‘ri Rossiya bankiga qarzni qaytarishi uchun), biroq Credit Suisse buni amalga oshirmadi.
Shundan so‘ng “Transkapitalbank” sudga murojaat qilishga qaror qildi. Sud ishni ko‘rib chiqib, Credit Suisse’ning Rossiyadagi aktivlarini, shu jumladan, bankning Moskva filiali hisob raqamlaridagi taxminan 10 million yevroni hibsga oldi.
Avvalroq AQSH O‘zbekiston kompaniyasiga qarshi sanksiyalar kiritgani haqida xabar berilgan edi.
Izoh (0)