Navoiy viloyatidagi hudud bir muddat dunyoning eng issiq nuqtasi bo‘ldi

Navoiy viloyatining g‘arbiy cho‘l hududi 22-iyul kuni dunyoning eng issiq nuqtasi bo‘ldi. Bu haqda meteorolog Erkin Abduahatov xabar bermoqda.

Buxoro va Navoiy viloyatlari ba’zi cho‘l stansiyalarida mahalliy vaqt bilan soat 11:00 ning o‘zidayoq havo harorati qiymatlari +44 darajadan yuqorilab ketgan.

Navoiy shahri hokimligi axborot xizmati avvalroq viloyatda havo harorati 47 darajagacha ko‘tarilishidan ogohlantirgan. Unga ko‘ra, hududda havo biroz bulutli bo‘lishi, yog‘ingarchilik kutilmasligi aytilgan. Harorat kechasi 27—32 daraja, kunduzi 40—45 daraja, ba’zi joylarda 47 daraja issiqqacha ko‘tarilishi qayd etilgan.

“O‘zgidromet” xizmati esa soat 13:50 holatidagi tezkor meteo ma’lumotiga ko‘ra Navoiyning Mashiquduq cho‘l kuzatuv stansiyasida havo harorati +46.3 darajaga yetganini bildirgan. Respublika aholisidan issiq ob-havoda o‘zini tutish qoidalariga rioya qilish va sog‘lig‘iga e’tiborli bo‘lish so‘ralgan.

Shunindek, Favqulodda vaziyatlar vazirligi anomal issiqdan qanday saqlanish mumkinligi haqida ma’lumot bergan. Unga ko‘ra,

• ko‘proq suv ichish;
• eng issiq paytda — soat 12:00 dan 16:00 gacha ko‘chaga chiqmaslik;
• ko‘proq dush qabul qilish;
• ertalab va kechqurun ko‘proq harakat qilish;
• ovqatlanish ratsionini o‘zgartirib, issiq kunda ko‘proq sovuq taomlar iste’mol qilish;
• taomlarni tuz bilan tanovul qilish (yuqori haroratda, tananing terlashi natijasida ko‘p miqdorda natriy moddasi yo‘qotiladi);
• sintetik matodan tayyorlangan kiyimlar kiymaslik;
• kepka, shlyapa yoki panamalar kiyishdan uyalmaslik kerak.