Навоий вилоятининг ғарбий чўл ҳудуди 22 июль куни дунёнинг энг иссиқ нуқтаси бўлди. Бу ҳақда метеоролог Эркин Абдуаҳатов хабар бермоқда.
Бухоро ва Навоий вилоятлари баъзи чўл станцияларида маҳаллий вақт билан соат 11:00 нинг ўзидаёқ ҳаво ҳарорати қийматлари +44 даражадан юқорилаб кетган.
Навоий шаҳри ҳокимлиги ахборот хизмати аввалроқ вилоятда ҳаво ҳарорати 47 даражагача кўтарилишидан огоҳлантирган. Унга кўра, ҳудудда ҳаво бироз булутли бўлиши, ёғингарчилик кутилмаслиги айтилган. Ҳарорат кечаси 27—32 даража, кундузи 40—45 даража, баъзи жойларда 47 даража иссиққача кўтарилиши қайд этилган.
«Ўзгидромет» хизмати эса соат 13:50 ҳолатидаги тезкор метео маълумотига кўра Навоийнинг Машиқудуқ чўл кузатув станциясида ҳаво ҳарорати +46.3 даражага етганини билдирган. Республика аҳолисидан иссиқ об-ҳавода ўзини тутиш қоидаларига риоя қилиш ва соғлиғига эътиборли бўлиш сўралган.
Шуниндек, Фавқулодда вазиятлар вазирлиги аномал иссиқдан қандай сақланиш мумкинлиги ҳақида маълумот берган. Унга кўра,
- кўпроқ сув ичиш;
- энг иссиқ пайтда — соат 12:00 дан 16:00 гача кўчага чиқмаслик;
- кўпроқ душ қабул қилиш;
- эрталаб ва кечқурун кўпроқ ҳаракат қилиш;
- овқатланиш рационини ўзгартириб, иссиқ кунда кўпроқ совуқ таомлар истеъмол қилиш;
- таомларни туз билан тановул қилиш (юқори ҳароратда, тананинг терлаши натижасида кўп миқдорда натрий моддаси йўқотилади);
- синтетик матодан тайёрланган кийимлар киймаслик;
- кепка, шляпа ёки панамалар кийишдан уялмаслик керак.
Изоҳ (0)