MIBning Farg‘ona viloyati boshqarmasi qidiruv sho‘basi tomonidan joriy yilning birinchi yarmida jami 721 nafar shaxsga nisbatan qidiruv olib borilib, ularning 423 nafari topilgan. Bu haqda “Daryo”ga boshqarma axborot xizmati ma’lum qildi.
Qayd etilishicha, ulardan 1 milliard 780 million so‘mdan ortiq aliment pullari undirilishi, to‘lovdan bo‘yin tovlagan qarzdorlarga qonuniy chora ko‘rilishi ta’minlangan. 159 nafar qarzdorga nisbatan 15 sutkalik ma’muriy qamoq jazosi tayinlangan, 32 ta jinoyat ishi qo‘zg‘atilgan, 17 ta oila yarashtirilgan.
298 nafar qidiruvdagi shaxsning 222 nafari chet elda bo‘lib, 76 nafari mahalliy darajada qidirilmoqda.
Ma’lumot berilishicha, 2022-yilning birinchi yarim yilligida jami 99 ta avtotransport vositasiga nisbatan qidiruv tadbirlari olib borilib, shundan 50 tasi topilgan. Qolgan 49 tasi bo‘yicha qidiruv tadbirlari olib borilmoqda.
Izoh (0)