Bankomati 3 foiz komissiya olayotgan bank qaysi ekani izlansa-da topilmagan. Bu haqda 21-iyul kuni Toshkent shahrida bo‘lib o‘tgan matbuot anjumanida Markaziy bank raisi Mamarizo Nurmurodov ma’lum qildi.
Yaqinda ijtimoiy tarmoqlarda O‘zbekistondagi banklardan birining bankomatidan yirik miqdorda naqd pul yechish uchun 1,5 foizdan 3 foizgacha komissiya o‘rnatgani haqidagi xabar muhokamalarga sabab bo‘lgandi. Holat yuzasidan Markaziy bank munosabat bildirgan. Anjumanda ishtirok etgan “Daryo” muxbirining savoliga javoban, Markaziy bank rahbari o‘sha qaysi bank ekani qidirilgani, ammo topilmaganini bildirdi.
“Yordamchilarimga qaysi bankda 3 foiz komissiya olyapti ekan bilinglar deb aytdim. Lekin biz bunday bankni topa olmadik. Mening o‘zimga ham u nima mantiqda 3 foizlik komissiya olish tartibni kiritgani qiziq edi. Men bundan xursand bo‘ldim. Chunki u tizimga o‘zining yangicha siyosati bilan yondashyapti. Balki bu hech kimga yoqmasligi mumkin. Juda ko‘p e’tirozlar bo‘ldi. Biz ham o‘z fikrimizni aytdik.
Ko‘p davlatlarda bankomatlar komissiya foizi olmaydi degan gaplar bo‘ldi. Bankomatdan daromadini olmagan tijorat banklari raqamli plastik kartalar orqali ko‘rsatiladigan boshqa xizmatlardan 2-3 barobar qilib qoplab oladi. Bu bor narsa. Juda ko‘pinglar chet elda bo‘lgansizlar. Visa katada pul olgansizlar. Hisob-kitob qilgansizlar. Mayli O‘zbekistonning kartasi bo‘lmasin, xorijiy bank kartasida ham komissiya to‘lovi borku. Bizda ham banklar o‘zining kartasidan komissiyani kamroq olish holatlari endi-endi paydo bo‘lyapti. Masalan, xususiy banklarimizda bu narsa sekin-asta rivojlanyapti. Bankomatlardan 1 foizlik komissiya olish chegarasi uskuna, uni to‘ldirish va boshqa xarajatlardan kelib chiqib belgilangan”, – dedi Markaziy bank rasmiymi.
Mamarizo Nurmurodovning qo‘shimcha qilishicha, bugungi kundagi asosiy maqsad – naqd pulsiz hisob-kitoblar tizimini rivojlantirishdan iborat.
“Biz aholini naqd pulsiz hisob-kitoblar tizimini rivojlantirish strategiyasida, o‘sha karta chiqarish, bankomat tizimini rivojlantirishda oldimizga qo‘ygan eng asosiy maqsad, bu odamlarni yangi raqamlashtirish xizmatlaridan, bank xizmatlaridan foydalanishiga sharoit yaratishdir. Hozirgi aytilayotgan masala odamlarning oyligini kartaga tushirib, uni keyin bankomat orqali tarqatish degan masalani oldimizga qo‘yganimiz yo‘q. Endi bugungi kundagi vaziyat, u yerda juda ko‘p to‘g‘ri xulosalar bo‘ldi, qaysidir bankomatda pul yo‘qligi, ayrim qarashlar bo‘ldi 200 ming so‘mlik bankomatga pul yetmagani uchun chiqaryapti degan fikrlar ham bo‘ldi. Mayli, bu har kimning fikri. Bankomatlardagi qay bir joydagi uzilishlar bu hududiy logistikani tashkil qilishda kamchiliklar bo‘lishi mumkin”, – dedi u.
Avvalroq Markaziy bank raisi 200 000 so‘mlik muddatidan oldin chiqarilishi sabablarini ma’lum qilgandi.
Izoh (0)