Toshkentda “shovqinsiz” tramvay harakatini yo‘lga qo‘yishda 2 yo‘nalish ishlab chiqilmoqda

Toshkent shahrida tramvay harakatini tiklash loyihasining texnik-iqtisodiy asoslarini ishlab chiqish jarayonini avgust oyida yakunlash rejalashtirilgan. Bu haqda xalq deputatlari kengashining 15-iyul kuni bo‘lib o‘tgan sessiyasida shahar transport boshqarmasi boshlig‘i Anvar Jo‘rayev ma’lum qildi.

Uning so‘zlariga ko‘ra, tramvay choksiz birikkan relslar orqali “shovqinsiz” harakatlanadi. Texnik-iqtisodiy asoslarni ishlab chiqish uchun esa xorijlik mutaxassislar jalb etilgan.

Anvar Jo‘rayevning aytishicha, ikki yo‘nalishda — TTZ va “Ippodrom”dan Shimoliy vokzalgacha bo‘lgan yo‘nalish bo‘yicha takliflar tayyorlangan.

Prezidentga ikki yo‘nalishda takliflar tayyorlayapmiz. Birinchisi, TTZ massividan Shimoliy vokzalgacha, loyiha ikki bosqichda amalga oshiriladi. Ikkinchi yo‘nalish esa Chilonzor kiyim-kechak savdo majmuasidan, ya’ni “Ippodrom”dan Shimoliy vokzalgacha.

Nega biz bu ikki nuqtani tanladik? Ushbu ikki punkt orqali Toshkent viloyatidan shaharga katta yo‘lovchilar oqimi kirib keladi. Bu transport oqimining kirib kelishiga yo‘l qo‘ymaslik uchun biz bu yerda (metro yo‘nalishlari) takrorlanmaydigan tramvay yo‘nalishlarini belgilayapmiz, — dedi boshqarma boshlig‘i.

Shavkat Mirziyoyev 2022-yil 19-yanvar kuni Toshkent shahrida jamoat transportini rivojlantirish chora-tadbirlari bo‘yicha taqdimot bilan tanishgandi. “Menimcha” ko‘rsatuvida transport vazirining taqdimoti prezidentga ma’qul bo‘lmagani haqida so‘z borgan. Aynan ushbu ko‘rsatuvda telejurnalist Xayrulla Nuriddinov Toshkentga tramvay qatnovini qaytarish tarafdori ekanini aytib o‘tgan edi. Davlat rahbari 10-fevral kuni Samarqand viloyatiga tashrifi davomida fuqarolar murojaati sabab tramvayni Toshkentga qaytarishni aytib o‘tgandi. “Tramvayni Toshkentga ham qaytarmoqchimiz. Fuqarolardan bu borada ko‘plab xatlar va murojaatlar kelyapti”, — degan edi prezident.

Toshkent shahar hokimi o‘rinbosari Baxtiyor Rahmonov 16-fevral kuni poytaxt hokimligida bo‘lib o‘tgan matbuot anjumanida Navoiy ko‘chasida tramvay bo‘lmasligini aytgan edi. Transport boshqarma boshlig‘i Anvar Jo‘rayev esa tramvay bo‘yicha takliflar borligini bildirgandi.

Shuningdek, Belarus Toshkentda tramvayni qayta tiklash loyihasida ishtirok etishni rejalashtirayotgani ma’lum bo‘lgan.