O‘zbekistonda 2022/2023-o‘quv yilining 1-sinfi uchun hozirga qadar 530 ming nafardan ortiq o‘quvchi qabul qilindi

O‘zbekistonda 2022/2023-o‘quv yili uchun 1-sinfga qabul jarayonlari davomida 700 mingdan ortiq bolalarni qabul qilish rejalashtirilgan. Bugungi kunga qadar 530 ming nafardan ortiq o‘quvchi 1-sinfga qabul qilindi, deb xabar beradi Xalq ta’limi vazirligi.

Qayd etilishicha, ota-onalarga qulaylik yaratish va qabul jarayonlarini tartibli tashkil etish maqsadida 1-sinfga qabul 2 bosqichda, ya’ni 31-iyulga qadar mahalliy hokimlik qarorlari bilan biriktirilgan mikrohudud doirasida, 1-avgustdan so‘ng esa mikrohududdan tashqari hududlar bo‘yicha amalga oshirilishi belgilangan.

Maktabga qabul Toshkent shahri, Qoraqalpog‘iston Respublikasi va viloyatlarning markazidagi jami 25 ta shahar va tumanlardagi 816 ta umumta’lim maktablarida 1-sinfga qabul jarayonlari elektron shaklda davom etmoqda. Qolgan hududlarda esa belgilangan tartibda an’anaviy shaklda, ya’ni bevosita maktabda amalga oshirilmoqda.

1-sinfga qabul jarayoni bilan bog‘liq ota-onalarning murojaatlarini ko‘rib chiqish uchun Xalq ta’limi vazirligida Call-markaz tashkil etilgan va unga shu kunga qadar 7 mingga yaqin murojaatlar kelib tushgan.

“Murojaatlar mutaxassislar tomonidan o‘rganilib, qisqa muddatlarda hal etilmoqda”, — deyiladi xabarda.