Andijon viloyatida aliment to‘lovidan qarzdorligi bo‘lgan 5997 nafar shaxsning mamlakat hududidan xorijga chiqishi vaqtincha cheklangan, aliment pullarini o‘z vaqtida to‘lashdan bosh tortgan 445 nafar fuqaro esa javobgarlikka tortilgan. Bu haqda “Daryo”ga MIB viloyat boshqarmasi axborot xizmati xabar bermoqda.
Ma’lum qilinishicha, MIB viloyat boshqarmasi hamda uning hududiy bo‘limlari tomonidan aliment to‘lovchi shaxslarning mas’uliyatini oshirish bo‘yicha muntazam ravishda profilaktik suhbatlar, tushuntirishlar olib borilmoqda. Shunday bo‘lsa-da o‘z farzandlarining ta’minotidan bosh tortayotganlar bor.
“Joriy yilning olti oyi davomida 680 nafar qarzdor ota tomonidan jami 272 million 211 ming so‘mlik aliment pullari o‘z vaqtida to‘lanmagani sababli ma’muriy javobgarlik masalasini hal qilish uchun sudlarga taqdimnomalar kiritilgan. Natijada ulardan 445 nafariga nisbatan 15 sutka ma’muriy qamoq jazosi qo‘llanilgan. Ma’muriy javobgarlikdan xulosa chiqarmasdan aliment pullarini to‘lashdan bo‘yin tovlashda davom etgan qolgan 43 nafar shaxsga nisbatan esa jinoyat ishi qo‘zg‘atilgan”, — deydi boshqarma boshlig‘i Otabek Salmonov.
Qo‘shimcha qilinishicha, boshqarmaning qidiruv sho‘basi tomonidan o‘tgan davr mobaynida 5997 nafar qarzdor fuqaroning (jami 59 milliard 801 million so‘mlik ijro hujjatlari bo‘yicha) mamlakat hududidan chetga chiqish huquqlari vaqtincha cheklangan. Qidiruvga berilgan 799 nafar qarzdordan 438 tasi topilgan. 236 ta qidiruvga berilgan avtotransport vositalaridan 135 tasi topilgan.
Izoh (0)