Energetika vazirligi O‘zbekistonda kuzatilayotgan anomal issiq kunlarda elektr tarmog‘ida yuklamalarning oldini olish uchun fuqarolarga xonadonlar va ofislarga doir tavsiyalar berdi.
Qayd etilishicha, havo haroratining keskin ko‘tarilishi oqibatida elektr energiyasiga bo‘lgan talab ham keskin oshgan. Shu sababli elektr tarmoqlari va transformator punktlarida yuklama ortishi va tarmoqda nosozliklar kelib chiqishi mumkin.
Bunday anomal issiq kunlarda elektr tarmog‘ida zo‘riqishlarni oldini olish uchun xonadonlarga va ofislarga quyidagilar tavsiya etiladi:
- konditsionerlar ishlayotgan xonada eshik va derazalarni yopish;
- konditsionerni avtomatik rejimda ishlatish;
- xonadon egalari hamma xonalarda emas, quyoshga teskari bo‘lgan bir yoki ikki xonada konditsioner ishlatib, o‘sha xonalarda bo‘lishlari;
- kunning issiq paytida (soat 12:00 dan soat 20:00 gacha) imkon qadar boshqa xo‘jalik elektr buyumlari (elektr choynak, dazmol, chang yutkich, mikroto‘lqin uskuna, kir va idish yuvish mashinalari)ni ishlatmaslik;
- muzlatkichni quyosh tushmaydigan joyda, devorlardan kamida 15 sm masofa uzoqlikda ushlash;
- binoning quyosh tushadigan tarafidagi derazalar tashqarisidan, xonalarga quyosh tushishini cheklovchi matoli yo boshqa materiallardan to‘siqlar qo‘yish (shunda quyosh xona ichini emas, tashqaridagi materialni qizdiradi. Xona salqinroq bo‘ladi);
- do‘konlar, elektr sarfini kamaytirish maqsadida, muzlatkichlarning tashqi qurilmalarini do‘kon tashqarisiga joylashtirishlari taklif qilinadi. Shunda do‘kon ichida keraksiz issiqlik hosil bo‘lmaydi va do‘konni sovituvchi konditsionerlar ortiqcha elektr iste’mol qilmaydi;
- har bir xonadon, uy, ofis va do‘kon shu muhofaza choralarini ko‘rsa, o‘sha hududdagi transformator yuklamasining ortishining ehtimoli kamayadi.
Izoh (0)