Madrid shahridagi Ispaniya Sanoat, savdo va turizm vazirligida O‘zbekiston elchixonasi ko‘magida “O‘zbekiston temir yo‘llari” delegatsiyasining uchrashuvi tashkil etildi, deb xabar bermoqda Dunyo axborot agentligi.
Qayd etilishicha, uchrashuvdan maqsad “FIEM” korxonalarni internatsionalizatsiya qilish jamg‘armasidan 4 ta “Talgo-250” tezyurar elektropoyezdini xarid qilish uchun imtiyozli kreditlar ajratish masalasini muhokama qilishdan iborat bo‘lgan.
Elchixona ma’lumotiga ko‘ra, muzokaralarda “O‘zbekiston temir yo‘llari” AJ tezyurar yo‘lovchi poyezdlarini tashkil etish va ulardan foydalanish boshqarmasi boshlig‘i Sherzod To‘laganov hamda xalqaro hamkorlik va tashqi iqtisodiy aloqalar bo‘limi mutaxassisi A’zamxon Meliboyev qatnashgan. Ispaniya tomonidan esa Sanoat, savdo va turizm vazirligining Osiyo, YEIga a’zo bo‘lmagan Yevropa mamlakatlari va Okeaniya departamenti direktori o‘rinbosari Veronika Samper, “FIEM” jamg‘armasining mas’ul xodimlari ishtirok etgan.
Uchrashuvda Ispaniya vakillariga aksiyadorlik jamiyati faoliyati va O‘zbekistonda temiryo‘l qurilishi sohasida amalga oshirilayotgan loyihalar taqdim etilgan. Xususan, shu kungacha Ispaniyaning Patentes Talgo S.L.U. kompaniyasida ishlab chiqarilgan 6 ta tezyurar elektropoyezd “O‘zbekiston temir yo‘llari” tomonidan xarid qilingani ta’kidlangan. Oxirgi partiya 2021-yilda olib kelingan. Loyihalarni moliyalashtirish uchun Korxonalarni internatsionalizatsiya qilish jamg‘armasidan 30 yil muddatga 10 yillik imtiyozli davr bilan kredit jalb etilgan.
Shuningdek, Ispaniya tomoniga Buxoro—Urganch—Xiva temir yo‘l liniyasini elektrlashtirish loyihasining amalga oshirilishi haqida batafsil ma’lumot berilgan. Mazkur tezyurar liniya foydalanishga topshirilgandan so‘ng qo‘shimcha 4 ta elektropoyezd sotib olish nazarda tutilmoqda. Tomonlar loyihani moliyalashtirish uchun jamg‘armaning imtiyozli krediti hisobidan “Talgo-250” poyezdlarini xarid qilishni tashkil etish imkoniyatlarini muhokama qilgan.
Ispaniya tomoni Markaziy Osiyo mamlakatlari orasida yuqori tezlikdagi elektrlashtirilgan temir yo‘l aloqasini joriy etishda yetakchi bo‘lgan O‘zbekiston bilan bu boradagi hamkorlikni davom ettirish muhimligini ta’kidlagan. Ispaniya hukumatining tegishli vazirliklari rahbariyati tomonidan ushbu masalani ko‘rib chiqishda “FIEM” jamg‘armasidan imtiyozli shartlarda kredit ajratish imkoniyati masalasini ijobiy hal etish uchun barcha sa’y-harakatlar amalga oshirishi ma’lum qilingan.
Muzokara yakunlari bo‘yicha tomonlar ushbu masala bo‘yicha ekspertlar darajasida ishlashni davom ettirishga kelishib olgan.
Ma’lumot uchun, 2019-yilning iyun oyida “O‘zbekiston temir yo‘llari” AJ Ispaniyaning Patentes Talgo S.L.U. kompaniyasi bilan Talgo-250 seriyali ikkita tezyurar elektropoyezd sotib olish uchun shartnoma imzolangan. Kelishuvlarga ko‘ra, 2021-yil oktabr oyigacha “O‘zbekiston temir yo‘llari” AJ lokomotiv parkini ikkita tezyurar “Afrosiyob” elektropoyezdi bilan to‘ldirish kerak edi. Ispaniyaning Patentes Talgo S.L.U. kompaniyasi o‘z majburiyatlarini to‘liq va o‘z vaqtida bajargan. 1-oktabr kuni Toshkent markaziy temiryo‘l vokzalida “Afrosiyob” poyezdining so‘nggi tarkibining kelishi tantanali ravishda kutib olingan edi.
Izoh (0)