Европа Иттифоқи давлатларининг доимий вакиллари Россияга қарши янги, еттинчи санкциялар пакетини маъқуллади.
Литванинг Европа Иттифоқидаги доимий вакили Арнольдас Пранкевичуснинг сўзларига кўра, навбатдаги чекловлар қаторига Россиядан олтин импортини тақиқлаш, мамлакатга экспорт назоратининг янги чоралари, Сбербанк активларини музлатиш, 50 дан ортиқ жисмоний ва юридик шахсларга, жумладан сиёсатчилар, ҳарбийлар, бизнесменлар ва тарғиботчиларга нисбатан санкциялар қўллаш киради.
Аввалроқ ОАВ янги санкциялар рўйхатига Москва мери Сергей Собянин, Россия бош вазирининг биринчи ўринбосари Андрей Белоусов, «Ростех» раҳбари Сергей Чемезов, актёрлар Сергей Безруков ва Владимир Машков, шунингдек, «Тунги бўрилар» байкерлар клуби аъзолари ҳам киритилиши ҳақида ёзганди.
Шунингдек, Ғарб чекловлари остидаги Россия товарларини Литва орқали Калининград вилоятига ёки очарчилик муаммосига дуч келиш хавфи остида бўлган мамлакатларга олиб ўтишда тўсиқлар бўлмаслиги учун Евроиттифоқнинг аввалги чора-тадбирларига тузатишлар киритилиши маълум қилинди. Тузатишлар тиббий ва фармацевтика маҳсулотларини етказиб беришдаги муаммоларни бартараф этиши керак. Таъкидланишича, ЕИ «қишлоқ хўжалиги маҳсулотлари учун тўловларда узилишларга йўл қўймаслик учун» санкцияларга баъзи истиснолар киритишни режалаштирмоқда
Янги санкциялар Европа Иттифоқининг расмий журналида чоп этилганидан кейин 21 июль куни кучга киради.
ЕИнинг аввалги, олтинчи санкциялар пакети июнь ойи бошида тақдим этилган эди. У Европа Иттифоқининг Россия нефтидан босқичма-босқич воз кечишини назарда тутади.
Изоҳ (0)