Oliy Majlis Senati ishchi guruhi tomonidan 2022 yilning may-iyun oylarida Buxoro, Jizzax, Namangan va Farg‘ona viloyatlarida yangi ish o‘rinlarini yaratish va aholi bandligini ta’minlash borasida amalga oshirilayotgan ishlar samaradorligi o‘rganildi. Bu haqda Senat Kengashining navbatdagi majlisida Senatning Byudjet va iqtisodiy islohotlar masalalar qo‘mitasi raisi, ishchi guruh rahbari Erkin Gadoyev aytib o‘tdi, deb xabar bermoqda “Daryo” muxbiri.
Erkin Gadoyevning aytishicha, amalga oshirilgan ishlar bilan birga ayrim soha va yo‘nalishlarda, shuningdek shahar va tumanlarda yangi ish o‘rinlarini yaratish va aholi bandligini ta’minlashda bir qator kamchiliklarga yo‘l qo‘yilib, mavjud imkoniyatlardan samarali foydalanilmagan.
“Xizmatlar sohasida yaratilgan ish o‘rinlarining asosiy qismi o‘zini o‘zi band qilish hisobiga to‘g‘ri kelmoqda. Yangi savdo va xizmat ko‘rsatish ob’yektlarida ish o‘rinlarini yaratilishi Namangan viloyatida 7 foizni, Jizzax viloyatida 12 foizni va Buxoro viloyatida 21 foizni tashkil etadi xolos. Bundan tashqari, xizmatlar sohasida yaratilgan yangi ish o‘rinlari bir vaqtning o‘zida boshqa soha va yo‘nalishlarda ham aks ettirilishi sababli, hisobotlarda jami hududda yaratilgan ish o‘rni soni orttirib ko‘rsatilgan”, — deya qo‘shimcha qiladi Erkin Gadoyev.
Ta’kidlanishicha, Buxoro viloyatida xizmatlar sohasida o‘zini o‘zi band qilish yo‘nalishida yaratilganligi qayd etilgan 22,4 mingta ish o‘rnidan 15,5 mingtasi qishloq xo‘jaligida, uch mingtasi turizm va madaniyat sohasida takrorlangan.
Shuningdek, xizmatlar sohasidagi yuridik shaxslarda yaratilgan Farg‘ona viloyatida 837 ta va Namangan viloyatida 2,3 mingta ish o‘rnida aholi bandligi mazkur korxona va tashkilotlar tomonidan soliq hisobotida aks ettirilmagan.
Izoh (0)