Oliy Majlis Qonunchilik palatasida 20-iyul kuni navbatdagi “Hukumat soati” bo‘lib o‘tdi. Unda adliya vaziri Ruslanbek Davletov haydovchilik guvohnomalarini almashtirishda elektron tizimni joriy etish haqida ma’lumot berdi.
Vazirning ta’kidlashicha, bu jarayonda ortiqcha ovoragarchiliklarning oldini olish, keyin yana muammo bo‘lmasligi uchun elektron tizimga o‘tiladi.
“Bizda bir kamchilik bor — guvohnomaga imzo chekish kerak. Buning uchun, albatta, o‘zi kelib ketishiga to‘g‘ri kelmoqda. Biz hozir shuni olib tashlashga harakat qilyapmiz. Shu tartibni olib tashlasak, keyin markazlarga kelish shart emas bo‘ladi. Kelmanglar deymiz, qabul qilmaymiz ham. Faqat elektron tarzda qabul qilinadi”, — deydi vazir.
Tushuntirilishicha, guvohnomalar tayyor bo‘lgach, hammaniki pochta orqali berib yuboriladi. Yangi tizimga o‘tilmas ekan, aytilayotgan muammolar takrorlanaveradi. 5 yildan keyin ham xuddi shu muammo kuzatilaveradi.
Davletov bu tizimning o‘ziga yarasha talablari borligi va ayni vaqtda shular o‘rganilayotganini bildirdi.
Izoh (0)