Олий Мажлис Сенати ишчи гуруҳи томонидан 2022 йилнинг май июнь ойларида Бухоро, Жиззах, Наманган ва Фарғона вилоятларида янги иш ўринларини яратиш ва аҳоли бандлигини таъминлаш борасида амалга оширилаётган ишлар самарадорлиги ўрганилди. Бу ҳақда Сенат Кенгашининг навбатдаги мажлисида Сенатнинг Бюджет ва иқтисодий ислоҳотлар масалалар қўмитаси раиси, ишчи гуруҳ раҳбари Эркин Гадоев айтиб ўтди, деб хабар бермоқда «Дарё» мухбири.
Эркин Гадоевнинг айтишича, амалга оширилган ишлар билан бирга айрим соҳа ва йўналишларда, шунингдек шаҳар ва туманларда янги иш ўринларини яратиш ва аҳоли бандлигини таъминлашда бир қатор камчиликларга йўл қўйилиб, мавжуд имкониятлардан самарали фойдаланилмаган.
«Хизматлар соҳасида яратилган иш ўринларининг асосий қисми ўзини ўзи банд қилиш ҳисобига тўғри келмоқда. Янги савдо ва хизмат кўрсатиш объектларида иш ўринларини яратилиши Наманган вилоятида 7 фоизни, Жиззах вилоятида 12 фоизни ва Бухоро вилоятида 21 фоизни ташкил этади холос. Бундан ташқари, хизматлар соҳасида яратилган янги иш ўринлари бир вақтнинг ўзида бошқа соҳа ва йўналишларда ҳам акс эттирилиши сабабли, ҳисоботларда жами ҳудудда яратилган иш ўрни сони орттириб кўрсатилган», — дея қўшимча қилади Эркин Гадоев.
Таъкидланишича, Бухоро вилоятида хизматлар соҳасида ўзини ўзи банд қилиш йўналишида яратилганлиги қайд этилган 22,4 мингта иш ўрнидан 15,5 мингтаси қишлоқ хўжалигида, уч мингтаси туризм ва маданият соҳасида такрорланган.
Шунингдек, хизматлар соҳасидаги юридик шахсларда яратилган Фарғона вилоятида 837 та ва Наманган вилоятида 2,3 мингта иш ўрнида аҳоли бандлиги мазкур корхона ва ташкилотлар томонидан солиқ ҳисоботида акс эттирилмаган.
Изоҳ (0)