АҚШ Украинадаги урушда Россиянинг 15 минг ҳарбийси ҳалок бўлган, 45 мингга яқин одами яраланган бўлиши мумкин, деб ҳисобламоқда. Бу ҳақда АҚШ Марказий разведка бошқармаси директори Уильям Бернс Колорадо штати Аспен шаҳрида бўлиб ўтган Хавфсизлик форумидаги чиқишида айтиб ўтди.
«АҚШ разведка ҳамжамиятининг сўнгги ҳисоб-китобларига кўра, 15 000 га яқин Россия ҳарбийси ҳалок бўлган ва бундан уч баравар кўпи яраланган. Шундай қилиб, йўқотишлар жуда катта. Украиналиклар ҳам талафот кўрган — бироз камроқ бўлиши мумкин, аммо бу ҳам катта йўқотиш», — дейди Бернс.
Марказий разведка бошқармаси директори Владимир Путиннинг саломатлиги ёмонлашаётгани ҳақидаги тахминларга ҳам тўхталиб ўтди. «Президент Путиннинг соғлиғи ҳақида кўп миш-мишлар юрибди. Айтишимиз мумкинки, у соппа-соғ», — деди Бернс. Унинг қўшимча қилишича, бу АҚШ разведкасининг норасмий баҳоси.
Буюк Британия Мудофаа вазири Бен Уоллес апрель ойи охирида Украинада 15 минг россиялик ҳарбий ҳалок бўлганини айтганди. Британия ҳарбий разведкаси эса май ойи охирида Россиянинг йўқотишларини шундай баҳолаган.
Июль ойи ўрталарида Британия Мудофаа штаби бошлиғи адмирал Тони Радакин Украинадаги қарийб беш ойлик жангларда 50 минг россиялик аскарлар ё ҳалок бўлган ёки яраланганини айтди.
Очиқ маълумотларга асосланиб, «Медиазона» ва BBC 15 июлга қадар Украинада 4760 рус аскари ҳалок бўлганини тасдиқлади.
Украина Қуролли кучлари Бош штаби маълумотларига кўра, уруш бошланганидан 20 июлгача қарийб 39 минг россиялик ҳарбий ҳалок бўлган.
Россия Мудофаа вазирлиги жанговар ҳаракатлар даврида Россия армиясининг йўқотишлари ҳақида атиги икки марта расмий хабар берди. 2 март куни вазирлик 498 киши ҳалок бўлгани ва 1597 киши яралангани, 25 март куни эса 1351 киши ҳалок бўлгани ва 3825 киши яралангани ҳақида хабар берган эди.
Изоҳ (0)