Agar AQSH Davlat departamenti Rossiyani terrorizm homiysi sifatida tan olmasa, bu ishni Kongress amalga oshiradi. Bu haqda Vakillar palatasi spikeri Nensi Pelosi Davlat kotibi Entoni Blinken bilan suhbatda ayti, deb yozadi Politico manbalarga tayanib.
“Kongressda qonun qabul qilish kotib qaroridan ko‘ra qiyinroq ekani ma’lum, ammo ma’muriyatning iqtisodiy bosim va Putinga qarshi ritorikani kuchaytirishi uchun bu zarur”, — dedi Kongress rasmiysi. Shuningdek, u Kongressning bunday rezolyutsiyani qabul qilishiga to‘sqinlik qiladigan qonuniy sabablar yo‘qligini ta’kidladi.
Boshqa davlatning terrorizm homiysi sifatida tan olinishi bu davlat bilan o‘zaro munosabatlarni qattiq cheklash, unga mudofaa tovarlarini eksport qilishni taqiqlash, ikki maqsadli mahsulotlar (ham fuqarolik mahsulotlari, ham qurol yaratishda ishlatiladigan) eksportini nazorat qilish, moliyaviy va boshqa cheklovlarni nazarda tutadi. Davlat departamenti veb-saytida aytilishicha, qaror, shuningdek, “terrorizmga homiylik qiluvchi davlatlar bilan savdo qilgan shaxslar va mamlakatlarni jazolaydigan boshqa sanksiyalar to‘g‘risidagi qonunlarni” kiritishni ham nazarda tutadi. Bu shuni anglatadiki, AQSH sanksiyalari iqtisodiyotning ayrim tarmoqlari bilan cheklanib qolmaydi, deya ta’kidladi Politico.
Shu kungacha AQSH terrorizm homiysi sifatida to‘rtta davlatni tan olgan: Suriya (1979-yil dekabrda), Eron (1984-yil yanvarda), Shimoliy Koreya (2017-yil noyabrda) va Kuba (2021-yil yanvarda).
Ukraina prezidenti Vladimir Zelenskiy amerikalik hamkasbi Jo Bayden bilan suhbatda Rossiyani terrorizmga homiylik qiluvchi davlat sifatida tan olishni so‘radi, deb yozgan edi Washington Post aprel oyida. Bunga javoban Bayden mazkur masalada aniq bayonotlar bermagan va rasmiy Moskvaga bosim o‘tkazishning turli yo‘llarini ko‘rib chiqishga tayyorligini ta’kidlagan.
Izoh (0)