Italiya bosh vaziri Mario Dragi mamlakat prezidenti Serjo Mattarellaga o‘z iste’fosi haqidagi so‘rovni ikkinchi marta topshirdi, deb xabar bermoqda Reuters.
Prezident idorasining xabar qilishicha, Mattarella uning iste’fosini “e’tiborga olgan” va Dragidan vaqtinchalik bosh vazir lavozimida qolishni so‘ragan.
Mattarella buyog‘iga nima qilmoqchiligi hozircha noma’lum. Reuters agentligining manbalarga tayanib, xabar berishicha, Italiya prezidenti parlamentni tarqatib yuborishi va oktabr oyida muddatidan oldin saylovlar o‘tkazishi mumkin.
Bir hafta oldin, 14-iyul kuni Mario Dragi Italiya hukumatini qo‘llab-quvvatlovchi parlamentning hukmron koalitsiyasida bo‘linish yuz bergani tufayli iste’foga chiqishini ma’lum qilgandi. O‘shanda Serjo Mattarella iste’foni qabul qilishdan bosh tortdi va Dragidan parlamentda uning hukumati 2023-yil boshiga qadar barqaror ko‘pchilikka umid qila oladimi yoki yo‘qligini aniqlashni so‘radi.
Parlament koalitsiyasida uzil-kesil bo‘linish 20-iyul kuni, Dragining uchta asosiy hamkori u chaqirgan ishonch votumini rad etishi ortidan yuz berdi.
Mario Dragi 2021-yilning fevralida Italiya bosh vaziri lavozimini egallagan. Ukrainada urush boshlanganidan so‘ng, u Kiyevni faol qo‘llab-quvvatlovchi Yevropa liderlaridan biriga aylandi.
Iyun oyida Italiya parlamentidagi eng yirik partiya – hukmron koalitsiya tarkibiga kiruvchi “Besh yulduz harakati”da bo‘linish yuz berdi. Bu Ukrainaga qurol yetkazib berish masalasi bilan bevosita bog‘liq edi. Xususan, partiya qurol yetkazib berishni qo‘llab-quvvatlashdan bosh tortgani uchun Italiya tashqi ishlar vaziri Luiji Di Mayo undan chiqib ketdi.
Izoh (0)