Олий Мажлис Қонунчилик палатасида 20 июль куни навбатдаги «Ҳукумат соати» бўлиб ўтди. Унда адлия вазири Русланбек Давлетов ҳайдовчилик гувоҳномаларини алмаштиришда электрон тизимни жорий этиш ҳақида маълумот берди.
Вазирнинг таъкидлашича, бу жараёнда ортиқча оворагарчиликларнинг олдини олиш, кейин яна муаммо бўлмаслиги учун электрон тизимга ўтилади.
«Бизда бир камчилик бор — гувоҳномага имзо чекиш керак. Бунинг учун, албатта, ўзи келиб кетишига тўғри келмоқда. Биз ҳозир шуни олиб ташлашга ҳаракат қиляпмиз. Шу тартибни олиб ташласак, кейин марказларга келиш шарт эмас бўлади. Келманглар деймиз, қабул қилмаймиз ҳам. Фақат электрон тарзда қабул қилинади», — дейди вазир.
Тушунтирилишича, гувоҳномалар тайёр бўлгач, ҳамманики почта орқали бериб юборилади. Янги тизимга ўтилмас экан, айтилаётган муаммолар такрорланаверади. 5 йилдан кейин ҳам худди шу муаммо кузатилаверади.
Давлетов бу тизимнинг ўзига яраша талаблари борлиги ва айни вақтда шулар ўрганилаётганини билдирди.
Изоҳ (0)