Shavkat Mirziyoyev global miqyosda muloqot va ishonch yo‘qolayotgani haqida gapirdi

Shavkat Mirziyoyev Qirg‘izistonda bo‘lib o‘tayotgan Markaziy Osiyo davlatlari rahbarlarining to‘rtinchi Maslahat uchrashuvidagi nutqida xalqaro tartibning tez o‘zgarib borayotgani, global miqyosda muloqot va ishonch yo‘qolayotgani haqida gapirdi. Bu haqda prezident matbuot kotibi xabar berdi.

Bu yerda mintaqamizga bevosita ta’sir ko‘rsatayotgan dunyodagi murakkab vaziyatga berilgan baholarga qo‘shilaman. Oqibatlarini oldindan aytish qiyin bo‘lgan xalqaro tartibning tez o'zgarishi kuzatilmoqda. Biz global miqyosda muloqot va ishonch kamayib borayotganiga guvoh bo‘lmoqdamiz.

Jahon iqtisodiyotida inqirozning kuchayishi sabab mamlakatlarimiz an’anaviy ta’minot zanjirlarining buzilishi kabi muammolarga duch kelmoqda, import inflyatsiyasi oshib bormoqda, oziq-ovqat va energetika xavfsizligini ta’minlash xatarlari bir necha barobar ortdi. Bunday sharoitda Maslahat uchrashuvlari doirasidagi ko‘p tomonlama hamkorlikni muvofiqlashtirish va samaradorligini oshirishga bo‘lgan talab yanada ortib bormoqda, — dedi Mirziyoyev.

Davlat rahbarining so‘zlariga ko‘ra, butun mintaqa tinchligi, barqarorligi va farovonligi hamjihatlik va Markaziy Osiyo umumiy manfaatlarini himoya qilish bo‘yicha qat’iy choralar ko‘rishga bog‘liq. Nutqda ko‘p qirrali munosabatlarni yanada mustahkamlash va amaliy mintaqaviy hamkorlikni rivojlantirish maqsadida umumiy sa’y-harakatlarni sheriklikning quyidagi asosiy yo‘nalishlariga qaratish zarurligi qay etildi.

Birinchisi, iqtisodiy jihat. Tahlillar shuni ko'rsatadiki, ijobiy dinamikaga qaramay, mamlakatlarimiz o‘rtasidagi savdo-iqtisodiy hamkorlik salohiyati haligacha oshmagan. Hisob-kitoblarga ko‘ra, bugungi kunda mintaqa davlatlari o‘rtasidagi savdo aylanmasi 5—10 foizni tashkil etadi.

Shu munosabat bilan biz o‘zaro savdoni rag‘batlantirishning yangi shakl va mexanizmlarini faol joriy etishni taklif qilamiz. Gap tovarlarni yetkazib berishda yagona qoidalar va soddalashtirilgan tartiblarga ega bo‘lgan chegara savdo zonalari tizimini yaratish haqida bormoqda. Bu yerda uchinchi mamlakatlardan qimmat va har doim ham sifatli bo'lmagan importni ishlab chiqaruvchilarimiz mahsulotlari bilan almashtirish bo'yicha harakatlarni qo‘llab-quvvatlash muhimdir, — dedi prezident.

Yana bir muhim vazifa sifatida sanoat kooperatsiyasining qo‘shma loyihalarini ilgari surish ekani keltirib o‘tildi. Ta’kidlanishicha, ishbilarmon doiralar raqobatbardosh ustunliklardan va mintaqa mamlakatlari iqtisodiyotini bir-birini to‘ldirish omilidan foydalangan holda ishlab chiqarish quvvatlarini oshirishdan manfaatdor.

Shu munosabat bilan sanoatni rivojlantirish milliy dasturlari asosida sanoatni mahalliylashtirish va import o‘rnini bosuvchi Markaziy Osiyo makonini shakllantirish bo‘yicha yagona yondashuvlarni joriy etish muhim ahamiyatga ega.

Iqtisodiyot tarmoqlarini raqamlashtirish masalalariga alohida e’tibor qaratishni taklif etaman, bu esa xarajatlarni kamaytirish va mahsulotlarning raqobatbardoshligini ta’minlaydi.

Savdo-iqtisodiy aloqalarni yanada rivojlantirish maqsadida mintaqalararo to‘g‘ridan to‘g‘ri hamkorlik salohiyatidan ham kengroq foydalanish va har yili o‘tkaziladigan Markaziy Osiyo mintaqalari forumini boshlashni taklif etamiz. Shu bilan birga, umumiy hududiy sarmoyaviy jozibadorlikni oshirish uchun yagona qulay ishbilarmonlik muhitini yaratishga harakat qilish zarur, — degan davlat rahbari nutqida.