Amerikaning Apple korporatsiyasi kelgusi yilda yuzaga kelishi mumkin bo‘lgan iqtisodiy inqirozni yengish uchun xodimlar yollash va bir qator bo‘limlarni moliyalashtirishni sekinlashtiradi. Bu haqda Bloomberg xabar bermoqda.
Har yili Apple tadqiqot, ishlanmalar, resurslar va ishga yollash xarajatlari uchun har bir bo‘limga mablag‘ ajratadi.
2023-yilda bir qator jamoalarga kutilganidan kamroq budjet ajratiladi. Bundan tashqari, korporatsiyaning ayrim bo‘linmalarida xodimlar soni ko‘paytirilmaydi. Ayrimlarida ishdan ketgan xodimlarning lavozimlari almashtirilmaydi.
Kompaniya noaniqlik davrida ehtiyotkor bo‘lishni niyat qilmoqda, lekin bu bir qator bo‘limlarga taalluqli bo‘lmaydi, — deb yozadi nashr.
Apple bosh direktori Tim Kukka ko‘ra, mavjud inflyatsiya korporatsiyaga — yalpi daromad va operatsion xarajatlarga ta’sir qiladi. Bundan tashqari, koronavirus pandemiyasining salbiy oqibati va transport xarajatlarining oshishi hali ham o‘z ta’sirini o‘tkazmoqda.
Kompaniyaning moliyalashtirish va ishga yollashni qisqartirish rejalari haqidagi xabarlardan so‘ng uning aksiyalari 2 foizga tushib, 147,2 dollarni tashkil qildi.
Bu yil boshidagi ko‘rsatkichdan 17 foizga kamaydi. Ma’lumotlar e’lon qilinganidan keyin 17-iyul kuni boshqa texnologiya kompaniyalarining aksiyalari ham pasaygan.
Avvalroq 30 yil davomida Apple’ning deyarli barcha dizaynlarini ishlab chiqqan odam kompaniyani tark etgani haqida xabar berilgandi.
Izoh (0)