Yevropaning tashqi harakatlar xizmatini Sharqiy hamkorlik, Rossiya, Kavkaz va Markaziy Osiyo bo‘yicha boshqaruvchi direktori o‘rinbosari Lyuk Devin boshchiligidagi delegatsiya 14-15-iyul kunlari joriy yilning 17-18-noyabr kunlarida Samarqandda bo‘lib o‘tadigan “Yevropa Ittifoqi - Markaziy Osiyo” barqaror o‘zaro aloqadorlik bo‘yicha konferensiyasi va vazirlar darajasidagi uchrashuviga tayyorgarlik ko‘rish uchun Toshkentda bir qator uchrashuvlar o‘tkazdi.
Janob Lyuk Devin 15-iyul kuni Toshkent shahrida tashrif yakunlariga bag‘ishlab o‘tkazilgan matbuot anjumanida O‘zbekistonni Jahon savdo tashkilotiga qirishi bo‘yicha olib borilayotgan tashkiliy ishlar yuzasidan fikr bildirib o‘tdi, bu haqda “Daryo” muxbiri xabar bermoqda.
“Ba’zi davlatlar tezroq va ko‘proq yurgan bo‘lishi mumkin. Bularning barchasi nisbiy. Jahon savdo tashkiloti o‘z yo‘nalishida yagona tashkilot hisoblanadi. O‘zbekiston uzoq yillar mana shu investitsiya doirasidan tashqarida bo‘lganini hisobga olish kerak. Ikki tomonlama hamkorlik, jumladan, hamkorlikni kengaytirish kelishuvi doirasida O‘zbekistonning tashkilotga kirishi borasida bir qancha masalalar bor. Biz texnik muzokaralar o‘tkazish jarayonidagi qator tadbirlarni o‘tkazishni moliyalashtirdik. Va shu tariqa texnik masalalarda ko‘maklashdik. Umid qilamizki, jarayon tez orada yakunlanadi va O‘zbekiston Jahon savdo tashkilotiga qo‘shiladi. Agar e’tibor qaratilsa, tashkilot a’zosi bo‘lmagan davlatlar iqtisodiy jihatdan rivojlanmagan mamlakatlar hisoblanadi. Tabiiy neft va gazi borasida muammosi yo‘q davlatlarni hisobga olmaganda, albatta”, – dedi janob Lyuk Devin
Noyabr oyida YI va Markaziy Osiyoning vazirlar darajasidagi uchrashuv hamda Markaziy Osiyo bilan o‘zaro aloqadorlik bo‘yicha YIning birinchi mintaqaviy konferensiyasi o‘tkaziladi
Markaziy Osiyo bilan barqaror o‘zaro aloqadorlik bo‘yicha Samarqand konferensiyasi 2021-yil dekabr oyida qabul qilingan YIning “Global darvoza” nomli yangi strategiyasi doirasidagi o‘zaro aloqadorlik bo‘yicha birinchi mintaqaviy konferensiya bo‘ladi. Bu esa YIning Markaziy Osiyo bo‘yicha strategiyasida keltirilgan barqarorlik, ravnaq topish va mintaqaviy hamkorlik maqsadlarini hayotga tatbiq etishga ko‘maklashuvchi umumiy konsepsiyalar bo‘yicha ichki-tashqi mintaqalararo muloqot uchun platformani ta’minlaydi. Bu Markaziy Osiyo mamlakatlariga modernizatsiyalash, investitsiyalarni rag‘batlantirish, raqamlashtirishda yordam ko‘rsatish, mintaqalararo ichki savdo va transport hamda savdo yo‘llarini diversifikatsiyalashda ko‘mak berish borasida YI sa’y-harakatlarining bir qismi bo‘ladi.
Har yili o‘tkaziladigan “YI - Markaziy Osiyo” vazirlar darajasidagi uchrashuvda beshta Markaziy Osiyo davlatlarining tashqi ishlar vazirlari, hamda Yevropa Ittifoqining tashqi ishlar va xavfsizlik siyosati bo‘yicha Oliy vakili - Yevropa komissiyasi raisining o‘rinbosari Jozep Borrel va xalqaro hamkorlik bo‘yicha YI komissari Yutta Urpilaynen ishtirok etadi, bu esa, o‘z navbatida, YI va Markaziy Osiyo o‘rtasidagi hamkorligini muhokama qilish imkonini beradi.
Eslatib o‘tamiz, 2021-yilning noyabr oyida Prezident Shavkat Mirziyoyev O‘zbekistonda amaliy tashrif bilan kelgan Jahon bojxona tashkiloti bosh kotibi Kunio Mikuriyani bilan suhbatda O‘zbekistonning tez fursatda Jahon savdo tashkilotiga kirishi bilan bog‘liq masalalarda yaqindan hamkorlik qilish zarur ekani ta’kidlangan edi.
Respublikaning JSTga a’zo bo‘lish jarayoni 2019-yil iyul oyida O‘zbekiston mazkur tashkilotga a’zo bo‘lish uchun tashqi savdo rejimi to‘g‘risidagi yangilangan memorandumni ko‘rib chiqishga taqdim etgan paytda boshlangan edi. O‘zbekistonning JSTga a’zo bo‘lishi jarayonining davom ettirilishi Shavkat Mirziyoyev tomonidan 2017—2021-yillarda O‘zbekistonning Harakatlar strategiyasida davlatning savdo-iqtisodiy sohasida rivojlanishning ustuvor yo‘nalishlaridan biri sifatida belgilangandi.
Shavkat Mirziyoyev 2020-yilning 29-dekabrida Oliy Majlisga yo‘llagan Murojaatnomasi davomida 2021-yilda JSTga a’zolik masalasi bo‘yicha ishlarni faollashtirish lozimligini ta’kidlagandi. O‘sha yili O‘zbekistonning JSTga a’zo bo‘lishi uchun idoralararo komissiya tuzildi.
2021-yil 26-oktabr kuni Sardor Umurzoqov JST rahbariyati bilan O‘zbekistonning tashkilotga a’zo bo‘lish masalasini muhokama qildi. Tashkilot rahbariyati respublikani JSTga a’zo bo‘lish jarayonida har tomonlama qo‘llab-quvvatlashga tayyor ekanligini bildirgan.
Izoh (0)