Namanganda sobiq kuyov qaynotasi bilan mojaroga aralashgan fuqaroni o‘ldirib qo‘ydi. Bu haqda “Daryo” muxbiri xabar bermoqda.
Hodisa 2022-yil 12-iyul kuni Namangan tumanining “G‘ayrat” mahallasida ro‘y berdi. Shu kuni ushbu mahallada yashovchi Ilhom Qodirovning (ism-shariflar shartli) xonadoniga Namangan shahrining Davlatobod tumanida istiqomat qiluvchi ikki nafar tanishi mehmonga keladi. Ular o‘zaro gurung qilib turgan payt davraga xonadon qo‘shnisi, mehmonlardan birining sobiq kuyovi 54 yashar Nodir Maqsudov qo‘shiladi va birgalikda spirtli ichimliklar iste’mol qilishadi.
Shu asnoda Nodir Maqsudov sobiq qaynotasi Tohir Muhsinov bilan eski oilaviy mojarolar sabab san-manga boradi va uni do‘pposlashga tushadi. Qaynotaning sherigi, 1958-yilda tug‘ilgan To‘lqin Dadaboyev ularni ajratmoqchi bo‘lganida esa xonadondagi qurilish ishlarida foydalanish uchun olib kelingan beton g‘isht bilan boshiga uradi.
T.Dadaboyev boshiga berilgan zarba oqibatida jiddiy jarohat oladi. Tez tibbiy yordam ko‘rsatish uchun tuman tibbiyot birlashmasiga olib ketilayotgan payt olamdan o‘tadi.
Mazkur jinoyatga qo‘l urgan sobiq kuyov tez orada qo‘lga olindi. Tuman prokuraturasi tomonidan Nodir Maqsudovga nisbatan Jinoyat kodeksining 97-moddasi 2-qismi bilan jinoyat ishi qo‘zg‘atilib, qamoqqa olindi.
Namangan tumanidagi Qumqo‘rg‘on madaniyat saroyida ushbu jinoyat muhokamasiga bag‘ishlangan yig‘ilish bo‘lib o‘tdi. Unda viloyat hokimi Shavkat Abdurazzaqov, viloyat prokurori Bektosh Sayipov va viloyat IIB boshlig‘i Shavkat Rahmonov ishtirok etib, mazkur holat va uni yuzaga keltirgan omillar yuzasidan fikrlarini bildirdi. Tumandagi kriminogen vaziyat va mahalla mas’ullari zimmasiga yuklatilgan vazifalarning ijrosi tanqid ostiga olindi.
Mavzuga doir:
Izoh (0)