Qashqadaryolik fermer Shahrisabz tumani hokimi Abdusamad Hasanovni bug‘doy o‘g‘irligida ayblab, “Abdusamad aka, endi birorta traktor ham yuboring, ishchilarimga aytaman g‘allaning somonini ham ortib beradi, olib ketasiz”, degandi. Tuman hokimi aynan shu fermerga kameralar qarshisida savol-javob qilish taklifini bergan. Bu haqda “Daryo” muxbiri xabar berdi.
Fermer va hokim muloqoti OAV vakillari ishtirokida bugun, 14-iyul kuni bo‘lib o‘tishi rejalashtirilgan. Biroq fermer noma’lum sabablarga ko‘ra, va’da qilingan uchrashuvga kelmagan.
Fermer va hokim muloqotini kuzatish uchun voqea joyiga borgan bloger Kapitan Karimovning yozishicha, Shahrisabz tumani hokimi jamoatchilik, xususan jurnalist va blogerlarni to‘plab, fermer bilan yuzma-yuz ko‘rishishga, uning barcha savollariga kameralar qarshisida javob berishga tayyorligini bildirgan. Ammo fermer hokimlik binosi oldigacha kelgan va noma’lum sabablarga ko‘ra, ichkariga kirmay ortiga qaytgan.
“Qiziq! Nega OAV orqali haq-huquqini talab qilgan fermer OAV vakillari va jamoatchilik yig‘ilgan joyda hokimni savollari bilan savalab tashlamadi? Yoki tuman hokimligi axborot xizmati aytganidek, u hokimga tuhmat qilganmidi? Tuhmat qilmagan bo‘lsa, bu uning uchun yaxshi imkoniyat va gapirish uchun minbar edi-ku?”, — deydi voqea haqida fikr bildirgan Qitmir muxbir.
Fermerning yonini olgan ijtimoiy tarmoq foydalanuvchisi bu vaziyatga izoh berib, “baraka topgurlar, axir fermerning otasi yaqinda olamdan o‘tgan. Bugun ertalab xudoyi qilib berayotgan edi. Qanday qilib borsin fermer? Hokim inson bo‘lsa, nega fermerning uyiga bormadi”, — degan. Bloger Kapitan Karimov esa postiga yozilgan mazkur izohni o‘chirgan. Sababi hozircha noma’lum.
Avvalroq Shahrisabz tumani hokimligi fermer tuman hokimiga tuhmat qilganini yozib, fermer va boshqalar ustidan tuman IIBga shikoyat qilganini ma’lum qilgandi.
“Daryo” voqealar rivojini kuzatishda davom etadi.
Izoh (0)