Namoyishlar tufayli mamlakatdan qochib ketgan Shri-Lanka prezidenti elektron pochta orqali iste’foga chiqqanini e’lon qildi

Ommaviy norozilik namoyishlari ortidan mamlakatni tark etgan Shri-Lanka prezidenti Gotabaya Rajapaksa iste’foga chiqqanini ma’lum qildi.

Reuters manbalariga tayanib xabar berishicha, 14-iyul kuni kechqurun Shri-Lanka rahbari mamlakat parlamenti spikeri nomiga iste’foga chiqish to‘g‘risida elektron pochta maktubini yo‘llagan.

13-iyul kuni Rajapaksa mamlakatdan Maldiv orollariga qochib ketgani ma’lum bo‘lgan edi. Shundan so‘ng u Singapurga yo‘l olgan. Mahalliy hukumatlar prezident ushbu mamlakatlarga shaxsiy tashrif bilan kelganini va boshpana so‘ramaganini ta’kidladi.

Shri-Lanka konstitutsiyasiga muvofiq Rajapaksa ketganidan keyin prezidentlik lavozimi bosh vazir Ranil Vikramasingxe zimmasiga yuklangan edi. Bu esa aholining qo‘shimcha noroziligiga sabab bo‘ldi. Natijada mamlakatda favqulodda holat joriy etildi, Kolomboda komendantlik soati e’lon qilindi.

Muvaqqat prezidentlik vakolatlari endi parlament spikeri Mahinda Yapa Abeyvardenaga berilgan. Shri-Lankaning yangi prezidenti 20-iyul kuni parlament a’zolari tomonidan saylanishi kutilmoqda.

Shri-Lankadagi eng yirik iqtisodiy inqiroz fonida bir necha kun avval minglab namoyishchilar prezident qarorgohi va idorasiga bostirib kirib, uning iste’fosini talab qildi. Gotabaya Rajapaksa evakuatsiya qilingani aytildi. Namoyishchilar bosh vazir Ranil Vikramasingxening (u ham prezident kabi iste’foga chiqishga rozi bo‘lgan) uyini ham egallab, binoga o‘t qo‘ygan. Politsiya bilan to‘qnashuvlarda 100 dan ortiq kishi jarohatlangan.