Оммавий норозилик намойишлари ортидан мамлакатни тарк этган Шри-Ланка президенти Готабая Ражапакса истеъфога чиққанини маълум қилди.
Reuters манбаларига таяниб хабар беришича, 14 июль куни кечқурун Шри-Ланка раҳбари мамлакат парламенти спикери номига истеъфога чиқиш тўғрисида электрон почта мактубини йўллаган.
13 июль куни Ражапакса мамлакатдан Мальдив оролларига қочиб кетгани маълум бўлган эди. Шундан сўнг у Сингапурга йўл олган. Маҳаллий ҳукуматлар президент ушбу мамлакатларга шахсий ташриф билан келганини ва бошпана сўрамаганини таъкидлади.
Шри-Ланка конституциясига мувофиқ Ражапакса кетганидан кейин президентлик лавозими бош вазир Ранил Викрамасингхе зиммасига юкланган эди. Бу эса аҳолининг қўшимча норозилигига сабаб бўлди. Натижада мамлакатда фавқулодда ҳолат жорий этилди, Коломбода комендантлик соати эълон қилинди.
Муваққат президентлик ваколатлари энди парламент спикери Маҳинда Япа Абейварденага берилган. Шри-Ланканинг янги президенти 20 июль куни парламент аъзолари томонидан сайланиши кутилмоқда.
Шри-Ланкадаги энг йирик иқтисодий инқироз фонида бир неча кун аввал минглаб намойишчилар президент қароргоҳи ва идорасига бостириб кириб, унинг истеъфосини талаб қилди. Готабая Ражапакса эвакуация қилингани айтилди. Намойишчилар бош вазир Ранил Викрамасингхенинг (у ҳам президент каби истеъфога чиқишга рози бўлган) уйини ҳам эгаллаб, бинога ўт қўйган. Полиция билан тўқнашувларда 100 дан ортиқ киши жароҳатланган.
Изоҳ (0)