Estoniya bosh vaziri Kaya Kallas prezident Alar Karisdan iste’fo so‘radi, deya xabar berdi Delfi nashri.
“Biz hukumatning navbatdan tashqari yig‘ilishini chaqirib, yangi Vazirlar Mahkamasini shakllantirish uchun mandat so‘radik. Hukumat dushanba kuni (18-iyul) ishga kirishadi. Vazirliklarga nomzodlar bugun tushdan keyin e’lon qilinadi”, — dedi Kallas.
Agentlikning qayd etishicha, Kallas bilan birga butun hukumat iste’foga chiqqan. Estoniya prezidenti yangi hukumatga muvaffaqiyatlar tiladi.
Shuningdek, Kallas 15-iyul kuni riygikogu (Estoniya parlamenti)ning navbatdan tashqari yig‘ilishini chaqirishni taklif qildi, yig‘ilishda u ‘‘Vatan’’ va Sotsial-demokratik partiya bilan o‘zining yangi hukmron koalitsiyasiga mandat so‘ramoqchi.
Markaz partiyasi va Islohotlar partiyasini o‘z ichiga olgan avvalgi hukmron koalitsiya iyun oyi boshida parchalangan, bunga bolalar bog‘chalarini modernizatsiya qilish to‘g‘risidagi qonun loyihasi ustidan kelishmovchiliklar sabab bo‘lgan.
O‘shanda Kallas hukumatdagi Markaz partiyasining barcha vakillarini o‘z lavozimidan chetlashtirishni taklif qilgan, prezident tegishli farmonni imzolagan.
Shundan so‘ng bosh vazir iste’foga chiqish niyatini bildirdi. “Bu taklifni o‘zim aytdim, chunki men agar yangi vazirlarni tayinlaganimda shovqin-suron va norozilik yuzaga kelardi”, — deya tushuntirdi u.
Kallasning so‘zlariga ko‘ra, “Vatan” partiyasi a’zolari yangi hukumatni imkon qadar tezroq tuzmoqchi.
Kaya Kallas 2010-yilda Estoniya islohotlar partiyasiga qo‘shilgan va bir yildan so‘ng Estoniya parlamentiga saylangan. 2014-yildan 2018-yilgacha u Yevroparlament deputati, Yevropa Ittifoqi—Ukraina hamkorlik qo‘mitasi delegatsiyasi raisining o‘rinbosari bo‘lgan.
2021-yilning yanvar oyida Yuri Ratas hukumati iste’foga chiqqanidan so‘ng Kallas hukumat rahbari va Estoniyada bu lavozimni egallagan birinchi ayol bo‘ldi. Uning qo‘l ostidagi vazirlarning yarmini ham ayollar tashkil qilgan.
Rossiya Ukrainada urush boshlaganidan keyin, Kaya Kallans Kiyevni ham siyosiy, ham moddiy jihatdan qo‘llab-quvvatlashga va’da berdi. U Ukrainaning Yevropa Ittifoqiga qabul qilinishini yoqladi.
Mavzuga doir: Boris Jonson Britaniya bosh vaziri lavozimidan iste’foga chiqayotganini e’lon qildi
Izoh (0)